२९ क्लास, अभ्यासिका चालकांसह ५१ विद्यार्थ्यांना नोटिस
marathinews24.com
पुणे – Pune MPSC Protest : एमपीएससी आयोगाच्या अनागोंदी कारभाराविरोधात शहरातील तीन वेगवेगळ्या ठिकाणी आंदोलन सुरू आहेत. संबंधित आंदोलने बेकायदेशीर असून, त्यांच्याविरूद्ध कारदेशीर कारवाई करण्यात येणार असल्याची माहिती पोलीस आयुक्त अमितेश कुमार यांनी दिली आहे. आंदोलनाला पोलिसांनी परवानगी नाकारली असतानाही काहीजणांकडून ही आंदोलने करण्यात येत आहेत. त्यापार्श्वभूमीवर पोलिसांनी २९ क्लास व अभ्यासिका चालकांना तसेच ५१ विद्यार्थ्यांना नोटीस बजावली आहे.
‘सेवा माझे योगदान’ अभियानाला पुणे जिल्ह्यात उत्स्फूर्त प्रतिसाद – सविस्तर बातमी
स्पर्धा परिक्षेचा अभ्यास करणार्‍या विद्यार्थ्यांकडून गेल्या चार दिवसांपासून आंदोलन सुरू आहे. विद्यार्थ्यांकडून विविध मागण्यासह आयोगाच्या अध्यक्षाच्या राजीनाम्याची मागणी केली जात आहे. मात्र, आंदोलनासाठी आवश्यक परवानगी घेतली नाही. Pune MPSC Protest त्यामुळे आयोजकांना आंदोलन करू नये, अशा सूचना दिल्या होत्या. तरीही आंदोलन सुरू ठेवण्यात आले आहे. एस.एम. जोशी पुलासह टिळक चौक तसेच शास्त्री रस्त्यावर हे आंदोलने सुरू आहेत. हजारोंच्या संख्येने विद्यार्थी आंदोलनात सहभागी झाले आहेत. आंदोलनचा आजचा चौथा दिवस झाला आहे.
आंदोलनाच्या ठिकाणी विविध राजकीय तसेच वेगवेगळ्या क्षेत्रातील व्यक्तीकडून भेट दिली जात आहे. आंदोलनांमुळे कायदा-सुव्यवस्थेचा प्रश्न निर्माण होऊ नये, यासाठी पोलिसांकडून बंदोबस्त तैनात केला आहे. आंदोलनाच्या ठिकाणी पोलिसांकडून परिस्थितीवर लक्ष ठेवले जात आहे. दरम्यान, आंदोलनाला प्रत्यक्ष किंवा अप्रत्यक्ष मदत करणार्‍या क्लास आणि अभ्यासिका चालकांनाही पोलिसांनी नोटिसा बजावल्या आहेत. संबंधितांना पोलिसांनी दिलेल्या सूचनांचे पालन करण्यास सांगण्यात आले होते. आंदोलनाच्या ठिकाणी केलेले चित्रीकरण, आयोजकांना दिलेल्या सूचना आणि नंतर सुरू असलेले आंदोलनाची माहिती संकलित केली जात आहे . त्यानुसार गुन्हे दाखल केले जाणार आहेत. आंदोलन करण्याचा अधिकार असला तरी सार्वजनिक ठिकाणी आंदोलनासाठी पोलिसांची पूर्वपरवानगी आवश्यक आहे. परवानगी नाकारल्यानंतरही आंदोलन सुरू ठेवल्यास आयोजक आणि संबंधितांवर कायदेशीर कारवाई केली जाणार आहे.
ड्रोनद्वारे चित्रीकरण, मालकाचा शोध सुरू
एस. एम. जोशी पुलावर सुरू असलेल्या आंदोलनादरम्यान संशयित ड्रोन उडत असल्याचे पोलिसांच्या निदर्शनास आले आहे. हे ड्रोन कोणी आणि कशासाठी उडविले, यासंदंर्भात पोलिस चौकशी करत आहेत. आंदोलनाचे शुटिंग किंवा इतर कारणांसाठी हे ड्रोन उडविले असल्यास त्यावर देखील कारवाई केली जाणार आहे. ड्रोनद्वारे चित्रीकरण करण्यासाठी पोलिसांची परवानगी आवश्यक असते. आंदोलनादरम्यान, कोणीही अशी परवानगी घेतलेली नसल्याचे पोलिसांनी स्पष्ट केले.
