भेटवस्तू पाठविण्याच्या आमिषाने ज्येष्ठाची फसवणूक

सायबर चोरट्यांविरुद्ध गुन्हा दाखल

marathinews24.com

पुणे-मोबाइलवरील गेम जिंकल्याने भेटवस्तू देण्यात येणार असल्याच्या आमिषाने सायबर चोरट्यांनी एका ज्येष्ठ नागरिकाची साडेतीन लाख रुपयांची फसवणूक केल्याचा प्रकार उघडकीस आला आहे. याबाबत एका ज्येष्ठ नागरिकाने सहकारनगर पोलीस ठाण्यात फिर्याद दिली आहे. त्यांनी दिलेल्या फिर्यादीनुसार सायबर चोरट्यांविरुद्ध गुन्हा दाखल करण्यात आला आहे.

प्रवासी बसच्या धडकेत पादचाऱ्याचा मृत्यू – सविस्तर बातमी 

पोलिसांनी दिलेल्या माहितीनुसार, तक्रारदार ज्येष्ठ नागरिक हे धनकवडी भागात राहायला आहेत. सायबर चोरट्यांनी त्यांच्या माेबाइल क्रमांकावर संपर्क साधला. मोबाइलवरील गेम जिंकल्याने तुम्हाला महागड्या भेटवस्तू पाठविण्यात येणार आहेत. महागडा मोबाइल संच, चामड्याची पिशवी अशा भेटवस्तू पाठविण्यात येणार असल्याचे आमिष चोरट्यांनी त्यांना दाखविले. त्यानंतर वेगवेगळी कारणे सांगून चोरट्यांनी त्यांना भेटवस्तू देण्याचे आमिष दाखवून पैसे घेतले. तक्रारदार ज्येष्ठाने चोरट्यांच्या खात्यात वेळोवेळी पैसे जमा केले. फसवणूक झाल्याचे लक्षात आल्यानंतर त्यांनी नुकतीच पोलिसांकडे तक्रार दिली. गुन्हे शाखेचे पोलीस निरीक्षक लोंढे तपास करत आहेत.