चोरट्यांविरुद्ध गुन्हा दाखल
marathinews24.com
पुणे – ज्येष्ठ महिलेच्या सदनिकेतून चोरट्यांनी एक लाख १८ हजार रुपयांचे सोन्याचे दागिने लांबविण्यात आल्याची घटना धनकवडीत घडली. याबाबत एका ज्येष्ठ महिलेने सहकारनगर पोलीस ठाण्यात फिर्याद दिली आहे. याप्रकरणी चोरट्यांविरुद्ध गुन्हा दाखल करण्यात आला आहे.
पीएमपी बसच्या धडकेत सायकलवरील एकाचा मृत्यू – सविस्तर बातमी
पोलिसांनी दिलेल्या माहितीनुसार, तक्रारदार ७७ वर्षीय ज्येष्ठ महिला धनकवडीतील ट्रायडंट सोसायटीत राहायला आहेत. त्यांच्या सदनिकेचा दरवाजा उघडा असल्याची संधी चोरट्यांनी साधली. शयनगृहातील टेबलवर ठेवलेल्या पिशवीतून चोरट्यांनी एक लाख १८ हजार रुपयांचे सोन्याचे दागिने लांबविल्याची घटना नुकतीच घडली. दागिने चोरीला गेल्याचा प्रकार उघडकीस आल्यानंतर महिलेने पोलिसांकडे तक्रार दिली. ज्येष्ठ महिलेच्या घरात चोरी करणारे चोरटे माहितगार असल्याचा संशय पोलिसांनी व्यक्त केला असून, सहायक पोलीस निरीक्षक श्रीकांत संघर्षी तपास करत आहेत.
हडपसरमध्ये घरफोडी
हडपसरमधील सातववाडी भागात सदनिकेचे कुलूप तोडून चोरट्यांनी रोकड, सोन्याचे दागिने असा एक लाख २५ हजार रुपयांचा ऐवज लांबविल्याची घटना घडली. याबाबत एकाने हडपसर पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, तक्रारदार हे सातववाडीतील श्रमिक काॅलनीत राहायला आहेत. चोरट्यांनी सदनिकेचे कुलूप तोडले. शयनगृहातील कपाट उचकटून सोन्याचे दागिने, तसेच स्वयंपाकघरातील एका बरणीत ठेवलेली दोन हजार रुपयांची रोकड चोरुन चोरटे पसार झाले. पोलीस उपनिरीक्षक राघवेंद्र सलगर तपास करत आहेत.
