पुनावळेकरांची महापालिका आयुक्तांकडे मागणी
marathinews24.com
पिंपरी – पिंपरी-चिंचवड महापालिकेने प्रसिद्ध केलेल्या नव्या विकास आराखड्यात पुनावळेतील कचरा डेपोचे आरक्षण रद्द केले आहे. तेथे प्रशासकीय व व्यावसायिक केंद्र उभारण्यात येणार आहे. त्याऐवजी ऑक्सिजन पार्क उभारण्याची मागणी पुनावळेतील नागरिकांनी केली आहे. त्याबाबत आयुक्त शेखर सिंह यांना त्यांनी निवेदन दिले आहे.
पालखी मार्गावरील पांढरे पट्टे गायब – सविस्तर बातमी
महापालिकेच्या वतीने नवीन विकास आराखडा प्रसिद्ध करण्यात आला आहे. जुन्या विकास आराखड्यानुसार पुनावळे येथील वन विभागाच्या ५७ एकर जागेत कचरा डेपो उभारण्यात येणार होता. त्याची प्रक्रियाही करण्यात आली होती. मात्र, स्थानिक नागरिक व तत्कालीन आमदार अश्विनी जगताप यांनी विरोध दर्शवला. तसेच जगताप यांनी तो विषय विधानसभेच्या अधिवेशनातही मांडला होता. त्यावर उद्योगमंत्री उदय सामंत यांनी कचरा डेपोचे आरक्षण रद्द करण्याच्या सूचना महापालिकेला दिल्या होत्या.
याबाबत पुनावळे येथील रहिवाशांनी पिंपरी-चिंचवड महापालिकेच्या प्रस्तावित कचरा डेपोला तीव्र विरोध केला. त्यांनी पर्यावरणीय चिंता आणि परिसरातील जलद शहरीकरण अधोरेखित करण्यासाठी बाईक रॅली आणि चिपको आंदोलनाचे आयोजन केले. त्यांच्या सततच्या आंदोलन आणि विरोधामुळे राज्य सरकारने ही पुनावळे कचरा डेपो योजना रद्द केली. पिंपरी-चिंचवड महापालिकेला पर्यायी जागा शोधण्याचे निर्देश दिले. त्यानंतर पिंपरी-चिंचवड महापालिकेने त्याच जमिनीवर प्रारूप विकास आराखड्यात कन्व्हेन्शन सेंटर बांधण्याचा निर्णय घेतला. तथापि, आता त्या योजनेलाही विरोध होत आहे.
रहिवासी निसर्गाच्या देणगीच्या जागी ऑक्सिजन पार्क विकसित करण्याचा आग्रह धरत आहेत. महापालिकेने नवीन विकास आराखडा बनविताना त्या ठिकाणी प्रशासकीय व व्यावसायिक केंद्र उभारण्याचे आरक्षण प्रस्तावित केले आहे. मात्र, त्याला देखील पुनावळे नागरिकांनी विरोध करत त्याठिकाणी ऑक्सिजन पार्क उभारावे, अशी मागणी केली आहे.
ऑक्सिजन पार्कचे वचन पूर्ण करा
पिंपरी-चिंचवडचे वेगाने शहरीकरण होत आहे. पुनावळे परिसरात वनजमीन ही शेवटची हिरवळ आहे. जिथे आता जवळजवळ १ लाख लोक राहतात. प्रदूषणाची पातळी वाढत चालली आहे, लोकसंख्येची घनता वाढत आहे. सार्वजनिक हिरव्या जागांचे प्रमाण कमी होत आहे, त्यामुळे या जमिनीवर कोणतेही बांधकाम सार्वजनिक आरोग्य आणि पर्यावरणीय शाश्वततेसाठी गंभीर धोका निर्माण होईल. मी पुनावळेकर संस्थेने पत्राद्वारे नागरिकांनी आक्षेपाची एक प्रत भाजपचे चिंचवडचे आमदार शंकर जगताप यांनाही सादर करण्यात आली, ज्यात त्यांनी हस्तक्षेप करून वनक्षेत्राचा पुढील विकास होण्यापासून संरक्षण करण्याची विनंती केली. शेकडो स्थानिक स्वाक्षऱ्यांच्या सह्याचे पत्राद्वारे ऑक्सिजन पार्कचे वचन पूर्ण करावे, अशी मागणी पुनावळे ग्रामस्थाकडून होऊ लागले आहे.
