कंटेनर चालकाने ५ वाहनांना उडवले
marathinews24.com
पुणे – शहरातील नवले पुल परिसरात पुन्हा एकदा अपघाताची घटना घडली आहे. भरधाव कंटेनर चालकाने पाठीमागू दिलेल्या धडकेत ५ वाहनांचे नुकसान झाल्याची घटना सोमवारी (दि. १७) दुपारच्या सुमारास घडली. सुदैवाने अपघातात कोणीही जखमी अथवा मृत्यूमुखी पडले नाहीत. मात्र, परिसरात मोठ्या प्रमाणावर वाहतूककोंडी झाली होती. घटनास्थळी सिंहगड रस्ता पोलिसांसह, स्थानिक नागरिक, वाहतूक पोलिसांनी मदतकार्य राबविले.
दंडात्मक कारवाईची ‘पीडीएफ फाईल’ पाठवून तरुणाची फसवणूक – सविस्तर बातमी
तीव्र उतारावर कंटेनर चालकाचे नियंत्रण सुटून अपघात झाल्याची प्राथमिक माहिती पोलिसांनी दिली आहे. दरम्यान, मागील गुरूवारी नवले पुलावर झालेल्या अपघातात ८ जणांचा जागीच मृत्यू झाला होता. तर १३ जण गंभीररित्या जखमी झाले होते. त्यानंतर सोमवारी दुपारच्या सुमारास अशाच पद्धतीने कंटेनर चालकाने वाहनांना धडक दिली. त्यामुळे परिसरातून प्रवास करणार्या वाहन चालकांमध्ये प्रचंड भीतीचे वातावरण निर्माण झाले होते. मात्र, फक्त वाहने एकमेकांना धडकल्यामुळे काचा फुटून नुकसान झाले.
अपघाताने वाहतूककोंडी, दूरवर रांगा
अपघामुळे परिसरातील वाहतूक पुर्णतः खंडित झाली होती. त्यामुळे अनेकांना कोंडीचा सामना करावा लागला. विशेषतःदुपारच्या सत्रात कार्यालयात जाणार्या चाकरमान्यांची कोंडीतून सुटका वेळेत झाली नाही. परिणामी अनेकांना कार्यालयात जायला उशीर झाल्याचे सांगण्यात आले. रस्त्यावरील अपघातग्रस्त वाहने बाजूला काढण्यासाठी क्रेन येईपर्यंत वाहतूक पोलिसांनी परिसरातील वाहतूक इतरत्र वळवून रस्ता मोकळा करण्यास प्राधान्य दिले होते.
