पोलिसांनी दोघांविरुद्ध केला गुन्हा दाखल
marathinews24.com
पुणे – स्वस्त सोने विकत घेणे महिलेला चांगलेच महागात पडले आहे. २५ लाख रुपयांत अर्धा किलो सोने देण्याच्या आमिषाने महिलेची २५ लाख रुपयांची फसवणूक करण्यात आल्याचा प्रकार उघडकीस आला. याप्रकरणी उत्तमनगर पोलिसांनी दोघांविरुद्ध गुन्हा दाखल केला आहे. याबाबत ५८ वर्षीय महिलेने उत्तमनगर पोलीस ठाण्यात फिर्याद दिली आहे. पवन मकसूद ठाकूर (वय ३९, रा. डाॅ. बाबासाहेब आंबेडकर रस्ता, मालाड, मुंबई), राजू गिट्टी यांच्याविरुद्ध गुन्हा दाखल करण्यात आला आहे.
गुंगारा देणारा हल्लेखोर पोलिसांच्या जाळ्यात – सविस्तर बातमी
पोलिसांनी दिलेल्या माहितीनुसार, तक्रारदार महिला आणि आरोपी ठाकूर यांची ओळख झाली होती. तक्रारदार महिला एनडीए रस्त्यावरील एका सोसायटीत राहायला आहे. आरोपींनी महिलेला २५ लाख रुपयांमध्ये अर्धा किलो सोने देण्याचे आमिष दाखविले होते. आरोपींनी महिलेकडून वेळोवेळी २५ लाख रुपये घेतले. पैसे दिल्यानंतर आरोपींनी महिलेला सोने दिले नाही. फसवणूक झाल्याचे लक्षात आल्यानंतर महिलेने नुकतीच तक्रार दिली. पोलीस उपनिरीक्षक धनवडे तपास करत आहेत.
