अपघातानंतर ट्रक चालकाला अटक
marathinews24.com
पुणे – भरधाव ट्रकच्या धडकेत पादचारी तरुणाचा मृत्यू झाल्याची घटना कात्रज-देहूरोड बाह्यवळण मार्गावर घडली. या प्रकरणी ट्रक चालकाला आंबेगाव पोलिसांनी अटक केली. अपघातात मृत्युमुखी पडलेल्या तरुणाची ओळख पटलेली नाही. तरुणाचे वय अंदाजे ३० ते ३५ वर्ष असून, तो फिरस्ता असावा, असा संशय पोलसांनी व्यक्त केला. या प्रकरणी ट्रक चालक विठ्ठल चांदराव गायकवाड (वय ३८, रा. पुरकी, चिमकी फाटा, चाकण, जि. पुणे, मूळ रा. किनाळा, जि. नांदेड ) याला अटक करण्यात आली. याबाबत पोलीस शिपाई नागेश कोळी यांनी आंबेगाव पोलीस ठाण्यात फिर्याद दिली आहे.
हडपसर परिसरात घरफोडी; कुलूप तोडून दागिने लांबविले – सविस्तर बातमी
पोलिसांनी दिलेल्या माहितीनुसार, कात्रज-देहूरोड बाह्यवळण मार्गावरुन २७ जुलै रोजी सायंकाळी सव्वासातच्या सुमारास भरधाव ट्रक निघाला होता. चारभुजा मार्बल दुकानासमोर भरधाव ट्रकने पादचारी तरुणाला धडक दिली. अपघातात तरुण गंभीर जखमी झाला. गस्त घालणाऱ्या पोलिसांनी नागरिकांच्या मदतीने तरुणाला तातडीने खासगी रुग्णालयात दाखल केले. उपचारांपूर्वीच त्याचा मृत्यू झाल्याचे वैद्यकीय तज्ज्ञांनी सांगितले. अपघातात मृत्युमुखी पडलेल्या तरुणाची ओळख पटलेली नाही. त्याची ओळख पटविण्यासाठी प्रयत्न करण्यात येत आहे. ट्रक चालकाला अटक करण्यात आली असून, सहायक पोलीस निरीक्षक फिरोज मुलाणी तपास करत आहेत.
