२४ तासात न्यायालयात आरोपपत्र दाखल
marathinews24.com
पुणे – शहरातील हडपसर भागात प्रवासी युवतीशी अश्लील कृत्य करुन पसार झालेल्या रिक्षाचालकाला पोलिसांनी अटक केली. आराेपी रिक्षाचालकाला अटक केल्यानंतर पोलिसांनी बालकांचे लैंगिक अत्याचारांपासून संरक्षण कायद्यान्वये (पोक्सो) २४ तासात न्यायालयात आरोपपत्र दाखल केले.
वाघोलीत अफू विक्री करणारा गजाआड – सविस्तर बातमी
शैलेश गुंडराव पाटील (वय २९, रा. मांजरी, हडपसर) असे अटक करण्यात आलेल्या रिक्षा चालकाचे नाव आहे. या प्रकरणातील तक्रारदार पीडित युवती अल्पवयीन आहे. ती गुरुवारी (९ ऑक्टोबर) हडपसरमधील माळवाडी भागातून रिक्षाने निघाली होती. रिक्षा प्रवासात आरोपी रिक्षा चालक पाटील याने युवतीशी अश्लील कृत्य केले. या घटनेनंतर घाबरलेल्या युवतीने हडपसर पोलीस ठाण्यात धाव घेऊन तक्रार दिली. त्यानंतर हडपसर पोलिसांनी त्वरीत ‘पोक्सो’ कायद्यान्वये गुन्हा दाखल केला. पोलिसांनी तातडीने तपास सुरू केला.
हडपसर भागातील सीसीटीव्ही कॅमेऱ्यांनी केलेले चित्रीकरण पोलिसांनी तपासले. त्याआधारे पोलिसांनी तपास करुन पसार झालेला रिक्षाचालक पाटील याचा माग काढला. पाटीलला अटक करण्यात आली. साक्षीदारांचे जबाब, तसेच पुरावे संकलित करुन पोलिसांनी रिक्षा चालक पाटील याच्याविरुद्ध २४ तासाच्या आत आरोपपत्र दाखल केले. अतिरिक्त पोलीस आयुक्त मनोज पाटील, उपायुक्त डाॅ. राजकुमार शिंदे यांच्या मार्गदर्शनाखाली हडपसर पोलीस ठाण्याचे वरिष्ठ पोलीस निरीक्षक संजय मोगले, गुन्हे शाखेचे निरीक्षक नीलेश जगदाळे, सहायक निरीक्षक हसीना शिकलगार, उपनिरीक्षक हसन मुलाणी, सत्यवान गेंड, संदीप राठोड, अमित साखरे, बापू लोणकर, अभिजित राऊत, कुंडलिक केसकर, मीरा रंधवे, साधना राठोड, पूनम खामकर यांनी ही कामगिरी केली.
