उपसभापती डॉ. नीलम गोऱ्हे यांची भावपूर्ण श्रद्धांजली
marathinews24.com
मुंबई – शिवसेनेच्या जडणघडणीत मोलाचा वाटा उचलणाऱ्या, विधानपरिषदेच्या सदस्य म्हणून निवडून येत शिवसेनेच्या पहिल्या महिला आमदार होण्याचा मान मिळविणाऱ्या कै. नीला देसाई यांच्या निधनाने शिवसेनेच्या जुन्या पिढीतील एका महत्त्वाच्या, नेत्या आपण गमावल्या आहेत, अशी भावपूर्ण श्रद्धांजली विधानपरिषद उपसभापती डॉ. नीलम गोऱ्हे यांनी अर्पण केली.
अल्पवयीन पीडितेचा २४ तासात पोलिसांनी लावला शोध – सविस्तर बातमी
कै. नीला देसाई यांचे शुक्रवार, दि. १६ जानेवारी २०२६ रोजी निधन झाले.
डॉ. नीलम गोऱ्हे यांनी यावर बोलताना म्हटले आहे की, “नीलाताईंसोबत माझे जिव्हाळ्याचे संबंध होते. दूरध्वनीद्वारे आमचा संपर्क होता. त्या विधानभवनात आल्यावर आमच्या प्रत्यक्ष भेटी होत आणि मग चर्चा व्हायची. शिवसेनेच्या महिला आघाडीच्या कार्यक्रमांमध्ये आम्ही काही वेळा एकत्र सहभागी झालो होतो.”
हिंदुहृदयसम्राट बाळासाहेब ठाकरे यांच्या विचारांवर निष्ठा ठेवणाऱ्या, आक्रमक महिला कार्यकर्त्या म्हणून कै. नीला देसाई यांची ओळख होती. त्यांनी केलेल्या कार्याचा संदर्भ आपण विधानपरिषदेत आपल्या कामकाजात दिल्याचेही डॉ. गोऱ्हे यांनी नमूद केले.
“त्यांच्या निधनाने शिवसेनेच्या संघर्षशील आणि अनुभवी नेतृत्वाची मोठी उणीव भासणार आहे. या दुःखद प्रसंगी मी देसाई कुटुंबीयांच्या दुःखात सहभागी असून ईश्वरचरणी प्रार्थना करते की दिवंगत आत्म्यास सद्गती लाभो आणि कुटुंबीयांना हे दुःख सहन करण्याचे बळ मिळो,” असेही डॉ. गोऱ्हे यांनी आपल्या श्रद्धांजलीपर भावना व्यक्त केल्या.
