सिंहगड रस्त्यावरील वडगाव बुद्रुक परिसरात घडली घटना
marathinews24.com
पुणे – भरधाव जीपच्या धडकेत दुचाकीवरील सहप्रवासी महिलेचा मृत्यू झाल्याची घटना सिंहगड रस्त्यावरील वडगाव बुद्रुक परिसरात घडली. अपघातात दुचाकीस्वार महिला गंभीर जखमी झाली. याप्रकरणी पोलिसांनी जीप चालकाला अटक केली. प्रतिभा दत्तात्रय घडशी (वय ५५, रा. धबाडी, आंबेगाव बुद्रुक) असे मृत्युमुखी पडलेल्या महिलेचे नाव आहे. अपघातात दुचाकीस्वार महिला मंगला अशोक काकडे (वय ६०, रा. श्री दत्त संस्कृती रेसीडन्सी, धबाडी) जखमी झाल्या. याप्रकरणी जीपचालक राजकुमार ज्ञानेबा राजपंगे (वय ३८, रा. श्री भैरवनाथ मंदिराजवळ, वडगाव बुद्रुक) याला अटक करण्यात आली. मंगला काकडे यांनी सिंहगड रस्ता पोलीस ठाण्यात फिर्याद दिली आहे.
शहरात दागिने हिसकाविणाऱ्या चोरट्यांचा धुमाकूळ – सविस्तर बातमी
पोलिसांनी दिलेल्या माहितीनुसार, दुचाकीस्वार मंगला काकडे आणि त्यांची मैत्री प्रतिभा या वडगाव बुद्रुकमधील धबाडी रस्त्याने ७ जानेवारी रोजी सायंकाळी पावणेआठच्या सुमारास निघाल्या होत्या. चरवड बंगल्यासमोर भरधाव जीपने दुचाकीला पाठीमागून धडक दिली. अपघातात दुचाकीवरील सहप्रवासी घडशी यांना गंभीर दुखापत झाली. भरधाव जीपने तेथून जाणाऱ्या दोन दुचाकीस्वारांना धडक दिली. अपघातात दोन दुचाकींचे नुकसान झाले. गंभीर जखमी झालेल्या घडशी यांना तातडीने रुग्णालयात दाखल करण्यात आले. उपचारांदरम्यान त्यांचा मृत्यू झाला.अपघातानंतर पोलीस निरीक्षक दिलीप दाईंगडे यांनी घटनास्थळी भेट दिली. अपघातानंतर जीपचालक राजपंगे याला ताब्यात घेऊन अटक करण्यात आली. पोलीस उपनिरीक्षक साळुंके तपास करत आहेत.
