पद्मावती परिसरात टेम्पोसह दुचाकींचे नुकसान
marathinews24.com
पुणे – किरकोळ कारणावरून झालेल्या वादातून टोळक्याने तरुणाला मारहाण केली. त्यानंतर बांबू आणि कोयत्याने वाहनांची तोडफोड केल्याची घटना बुधवारी (दि. २१) मध्यरात्री अडीच वाजण्याच्या सुमारास सहकारनगर पोलीस ठाण्याच्या हद्दीत पद्मावती येथील खंडाळे चौकात घडली आहे. पोलिसांनी एका तरुणाला ताब्यात घेतले आहे.
डेटींग ॲपवरील ओळखीतून तरुणाला लुटले – सविस्तर बातमी
पोलिसांनी दिलेल्या माहितीनुसार, फिर्यादी क्रिस चव्हाण व आरोपीमध्ये वाद होते. क्रिस हा मंगळवारी रात्री कामावरुन घरी आल्यानंतर तिघांनी त्याला अडवले. तेथे बाचाबाची झाल्यानंतर तिघेही क्रिसला मारण्यासाठी धावले. क्रिस त्यांच्या तावडीतून पळून जात असताना टोळक्याने परिसरात असलेल्या वाहनांची तोडफोड करण्यास सुरुवात केली. दिसेल त्या वाहनांची तोडफोड करत टोळक्याने नागरिकांमध्ये दहशत निर्माण केली.
स्थानिक नागरिकांनी पोलिस नियंत्रण कक्षाला फोन केल्यानंतर सहकारनगर पोलिस व गुन्हे शाखेची पथक घटनास्थळी दाखल झाले. तोडफोड प्रकरणी दिपक कदम याला ताब्यात घेण्यात आले असून त्याची गुन्हेगारी पार्श्वभूमी तपासली जात आहे. दरम्यान, महापालिका निवडणुकीत परिसरात तणावाचे वातावरण निर्माण झाले होते. पराभूत उमेदवाराचे काही कार्यकर्त्यांनी सलग दोन दिवस मोठा जमाव जमा केला होता. त्यामुळे येथे राजकीय वातावरण तंग आहे. या पार्श्वभूमीवर ही घटना घडल्यामुळे परिसरात विविध तर्कवितर्क लढवले जात आहेत.
