चोरट्यांविरुद्ध गुन्हा दाखल
marathinews24.com
पुणे – प्रादेशिक परिवहन कार्यालयाकडून दंडात्मक कारवाई करण्यात आल्याची ‘पीडीएफ फाईल’ पाठवून सायबर चोरट्यांनी एकाची अडीच लाख रुपयांची फसवणूक केली. याबाबत एकाने कोंढवा पोलीस ठाण्यात फिर्याद दिली आहे. त्यानुसार सायबर चोरट्यांविरुद्ध गुन्हा दाखल करण्यात आला आहे.
खडकीत गॅस सिलिंडर चोरणारा अटकेत – सविस्तर बातमी
पोलिसांनी दिलेल्या माहितीनुसार, तक्रारदार हे कोंढवा परिसरात राहायला आहेत. सायबर चोरट्यांनी १ नोव्हेंबर रोजी त्यांच्या मोबाइल क्रमांकावर एक ‘पीडीएफ फाईल’ पाठविली होती. प्रादेशिक परिवहन कार्यालयाकडून (आरटीओ) दंडात्मक कारवाई करण्यात आल्याचे संदेशात म्हटले होते. त्यानंतर तक्रारदारांनी ही फाईल उघडली. फाईल उघडताच चोरट्यांनी त्यांच्या मोबाइल क्रमांकामधील गोपनीय माहिती मिळविली. त्याआधारे चोरट्यांनी तक्रारदाराच्या बँक खात्यातील दोन लाख ४९ हजार ९९९ रुपये स्वत:च्या खात्यात जमा करुन घेतले. खात्यातून पैसे काढण्यात आल्याचे लक्षात आल्यानंतर तक्रारदाराने पोलिसांकडे तक्रार दिली. गुन्हे शाखेचे पोलीस निरीक्षक नवनाथ जगताप तपास करत आहेत.
दंडात्मक कारवाई करण्यात आल्याचे संदेश पाठवून सायबर चोरट्यांकडून नागरिकांची फसवणूक करण्याचे प्रकार गेल्या काही महिन्यांपासून वाढले आहेत.
