२३ सिलिंडर जप्त
marathinews24.com
पुणे – शहरातील खडकी परिसरात स्वयंपाकाच्या गॅस सिलिंडरची वाहतूक करणाऱ्या टेम्पोतून सिलिंडर चोरून नेणाऱ्या चोरट्याला पोलिसांनी अटक केली. त्याच्याकडून २३ सिलिंडर जप्त करण्यात आले. किरण लक्ष्मण जांभळे (वय ३७, रा. अप्पर ओटा, बिबवेवाडी) असे अटक करण्यात आलेल्या चोरट्याचे नाव आहे. जांभळे याने साथीदारांच्या मदतीने सिलिंडरचोरीचे आणखी काही गुन्हे केल्याची शक्यता आहे. त्या दृष्टीने तपास सुरू असल्याची माहिती पोलीस उपनिरीक्षक दिग्विजय चौगले यांनी दिली.
पुण्यात सराईतांची धरपकड, तिघांना बेड्या – सविस्तर बातमी
खडकी बाजार परिसरात स्वयंपाकाचे गॅस सिलिंडर वितरण करणाऱ्या टेम्पोतून सिलिंडर चोरीला जाण्याच्या घटना घडल्या हाेत्या. या गुन्ह्याचा पोलिसांकडून तपास करण्यात येत होता, सिलिंडर चोरी करणारा चोरटा जांभळे याची माहिती तपासात मिळाली. त्यानंतर पोलिसांनी सापळा लावून त्याला ताब्यात घेतले. ही कामगिरी परिमंडळ चारचे पोलीस उपायुक्त सोमय मुंढे, सहायक आयुक्त विठ्ठल दबडे यांच्या मार्गदर्शनाखाली खडकी पोलीस ठाण्याचे वरिष्ठ पोलीस निरीक्षक विक्रमसिंह कदम, उपनिरीक्षक चौगले, पोलीस कर्मचारी सुधाकर राठोड, गालीब मुल्ला, ऋषीकेश दिघे, शशी संकपाळ, आबा केदारी, शशांक डोंगरे, अनिकेत भोसले, सुधाकर तागड, दिनेश भोये यांनी केली.
