खुनाचा प्रयत्न केल्याप्रकरणी गुन्हा दाखल
marathinews24.com
पुणे – पोलिसांवर गोळीबार करणाऱ्या सराइताविरुद्ध खुनाचा प्रयत्न केल्याप्रकरणी वाघोली पोलिसांनी गुन्हा दाखल केला. नगर रस्ता भागात ही घटना घडली होती. पोलिसांनी प्रत्युत्तरादाखल केलेल्या गाेळीबारात सराइत जखमी झाला होता. ओंकार दिलीप भंडारी (वय २६, रा. विडी कामगार वसाहत, चंदननगर) असे गुन्हा दाखल केलेल्याचे नाव आहे. पोलीस उपनिरीक्षक रवींद्र ढावरे यांनी वाघोली पोलीस ठाण्यात फिर्याद दिली.
पादचारी जेष्ठाला गाठून लुटणार्या चोरट्याला अटक – सविस्तर बातमी
पोलिसांनी दिलेल्या माहितीनुसार, भंडारी सराइत असून, वाहन तोडफोडीचा गुन्हा त्याच्याविरुद्ध दाखल करण्यात आला होता. या गुन्ह्यात तो पसार झाला होता. चंदननगर पोलिसांकडून त्याचा शोध घेण्यात येत होता. शनिवारी सायंकाळी तो आव्हाळवाडी भागात लपून बसल्याची माहिती पोलिसांना मिळाली. त्यानंतर पोलिसांच्या पथक त्याला ताब्यात घेण्यासाठी तेथे रवाना झाले. पोलिसांनी सापळा लावला. तेव्हा भंडारी एका झुडपात लपला होता. त्याने त्याच्याकडील देशी बनावटीच्या पिस्तुलातून पोलिसांवर गोळीबार केला. पोलस उपनिरीक्षक रवींद्र ढावरे यांनी स्वसंरक्षणार्थ गोळीबार केला. पोलिसांनी झाडलेली गोळी भंडारीच्या मांडीत शिरल्याने तो जखमी झाला. त्याला तातडीने ससून रुग्णालयात दाखल करण्यात आले.पोलिसांवर गोळीबार करुन खुनाचा प्रयत्न केल्याप्रकरणी भंडारी याच्याविरुद्ध गुन्हा दाखल करण्यात आला आहे. वरिष्ठ पोलीस निरीक्षक युवराज हांडे तपास करत आहेत.
