सदाशिव पेठेत ओैषध दुकानातून पावणेतीन लाखांची रोकड चोरी

चोरट्यांविरुद्ध विश्रामबाग पोलिसांकडून गुन्हा दाखल

marathinews24.com

पुणे – शहरातील सदाशिव पेठेत ओैषध वितरकाच्या दुकानाचे कुलूप तोडून चोरट्यांनी गल्ल्यातील २ लाख ८२ हजारांची रोकड लांबविल्याची घटना घडली. या प्रकरणी चोरट्यांविरुद्ध विश्रामबाग पोलिसांकडून गुन्हा दाखल करण्यात आला आहे. याबाबत एका ओैषध वितरकाने विश्रामबाग पोलीस ठाण्यात फिर्याद दिली आहे. त्यांनी दिलेल्या फिर्यादीनुसार चोरट्यांविरुद्ध गुन्हा दाखल करण्यात आला आहे.

एक गाय वाचली तर एक आत्महत्या थांबेल-अभिनेता प्रवीण तरडे – सविस्तर बातमी 

पोलिसांनी दिलेल्या माहितीनुसार, सदाशिव पेठेतील भरत नाट्य मंदिरासमोर तक्रारदार ओैषध वितरकाचे दुकान आहे. गुरुवारी (१९ मार्च) सायंकाळी दुकान बंद करण्यात आले. चोरट्यांनी मध्यरात्री दुकानाचे कुलूप तोडले. गल्ल्यातील दोन लाख ८२ हजारांची रोकड चोरून चोरटे पसार झाले. शुक्रवारी (२० मार्च) सकाळी नेहमीप्रमाणे दुकान उघडण्यात आले. तेव्हा रोकड चोरीचा प्रकार उघडकीस आला. या घटनेची माहिती मिळताच विश्रामबाग विभागाचे सहायक पोलीस आयुक्त चंद्रकांत भोसले, वरिष्ठ पोलीस निरीक्षक प्रदीप कसबे यांनी घटनास्थळी भेट दिली. पोलिसांनी दुकानाच्या परिसरातील सीसीटीव्ही चित्रीकरण तपासले असून, पसार झालेल्या चोरट्यांचा शोध घेण्यात येत आहे. सहायक पोलीस निरीक्षक उमेश कारके तपास करत आहेत.