काळेपडळमध्ये रेल्वेच्या धडकेत मुलगा ठार
marathinews24.com
पुणे – पतंग उडवण्यासाठी घराबाहेर पडलेल्या ११ वर्षीय मुलाचा रेल्वेच्या धडकेत मृत्यू झाला. या घटनेमुळे परिसरात हळहळ व्यक्त केली जात आहे. महंमदवाडी बोगद्याजवळ रेल्वे रुळावर भीषण दुर्घटना घडली आहे. काळेपडळ पोलिस ठाण्यात याप्रकरणी आकस्मिक मृत्यूची नोंद केली आहे.
चिप्सच्या डब्याच्या नावाखाली गांजाची तस्करी – सविस्तर बातमी
प्रकाश डबले भुल (वय ११, गीत गंधर्व सोसायटी, ससाणेनगर मूळ नेपाळ) असे ठार झालेल्या मुलाचे नाव आहे. तो ससाणे नगरमधील गीतगंधर्व सोसायटीत कुटुंबासमवेत वास्तव्यास होता. बुधवारी (दि.१०) सायंकाळी तो पतंग उडवण्यासाठी घराबाहेर गेला होता. मात्र उशिरापर्यंत घरी न परतल्याने कुटुंबीयांनी शोधाशोध सुरू केली. रात्री उशिरापर्यंत शोध घेऊनही त्याचा ठावठिकाणा लागला नव्हता.
गुरुवारी (दि११) सकाळी साडेसातच्या सुमारास ट्रॅकमन प्रमोद सक्सेना यांना महंमदवाडी बोगद्याजवळ दोन रेल्वे रुळांच्या मधोमध एका मुलाचा मृतदेह आढळला. त्यांनी तात्काळ काळेपडळ पोलिसांना माहिती दिली. पोलिसांनी घटनास्थळी धाव घेतली. प्राथमिक तपासात रेल्वेच्या धडकेत त्याचा मृत्यू झाल्याचे आढळले. घटनेत कोणताही संशयास्पद प्रकार नसल्याचे वरिष्ठ पोलीस निरीक्षक मानसिंग पाटील यांनी सांगितले.
