७२ लाखांचा हाड्रोपोनिक गांजा जप्त
marathinews24.com
पुणे – आंतरराष्ट्रीय विमानतळावर सीमाशुल्क विभागाच्या (कस्टम) एअर इंटेलिजन्स युनिटने (एआययू) केलेल्या कारवाईत गांजा तस्करीची आणखी एक क्लुप्ती उघडकीस आणली आहे. चिप्ससारखे दिसणाऱ्या दोन बंद डब्यांमध्ये तब्बल ७१ लाख २० हजार रुपये किमतीचा हायड्रोपोनीक गांजा लपवून नेण्याचा महिलेचा प्रयत्न फोल ठरला. याप्रकरणी तिला अटक करण्यात आली आहे.
अल्पवयीन मुलींचे अपहरण करणाऱ्या दोघांना बेड्या – सविस्तर बातमी
कस्टम विभागाने दिलेल्या माहितीनुसार, ही घटना दि. ६ डिसेंबरला घडली. एअर इंडिया एक्सप्रेसच्या आयएक्स–२४१ या विमानातून आलेल्या एका महिला प्रवाशावर एआययूने मिळालेल्या माहितीच्या आधारे लक्ष ठेवले होते. तिच्या हालचाली संशयास्पद वाटताच अधिकाऱ्यांनी सामानाची सुक्ष्म तपासणी केली. या तपासणीत दोन बंद सिलेंडराच्या आकाराच्या डब्यांमध्ये पॅक केलेला ७२२ ग्रॅम हायड्रोपोनीक गांजा आढळला. डबे बाहेरून चिप्सचे चित्र लावून आकर्षक पद्धतीने पॅक केले होते, त्यामुळे ते खाद्यपदार्थ असल्याचा भास होत होता. मात्र, एआययूच्या दक्षतेमुळे तस्करीचा डाव हाणून पाडला गेला. जप्त करण्यात आलेल्या गांजाची काळ्या बाजारातील किंमत तब्बल ७२ लाख २० हजार रुपये इतकी आहे, असे अधिकाऱ्यांनी सांगितले.
महिलेला ताब्यात घेऊन एनडीपीएस कायद्यानुसार गुन्हा दाखल करण्यात आला आहे. हा माल कुठून आणला गेला आणि कोणाकडे पाठवण्याचा प्रयत्न होता, याचा तपास सुरू आहे. विमानतळावरून अमली पदार्थांची तस्करी विविध क्लुप्त्या वापरून करण्यात येते. मात्र, एअर इंटेलिजन्स युनिटच्या सततच्या सतर्कतेमुळे अशा प्रयत्नांना पुन्हा एकदा आळा बसला आहे.
