गुन्हे शाखेच्या खंडणी विरोधी पथकाची कारवाई
marathinews24.com
पुणे – गावठी पिस्तुलांची विक्री करण्याच्या तयारीत असलेल्या तस्कराला गुन्हे शाखेच्या खंडणी विरोधी पथक एकने अटक केली आहे. त्याच्याकडून ४ गावठी पिस्टल, तीन जिवंत काडतुसे, मॅगझिन असा दोन लाखांचा शस्त्रसाठा जप्त केला. याप्रकरणी पथकाने भुषण उत्तम मोहिते (वय २३) याला अटक करण्यात आली आहे.
पुण्यात महिलांवरील अत्याचाराच्या तीन घटना – सविस्तर बातमी
शहरात बेकायदेशीर शस्त्रे बाळगणारे, फरारी, तडीपार, रेकॉर्डवरील आरोपींविरुद्ध विशेष मोहीम राबविण्याचे आदेश वरिष्ठ पोलीस अधिकाऱ्यांनी दिले होते. त्यानुसार २७ जुलैला खंडणी विरोधी पथक एक पेट्रोलिंग करत होते. त्यावेळी पोलीस अंमलदार सचिन माळवे, सोमनाथ कांबळे, दयानंद तेलंगे पाटील यांना गोकुळनगर, नऱ्हे येथे एकजण गावठी पिस्टल विक्रीसाठी आल्याची माहिती मिळाली. त्याच्याकडे तीन ते चार पिस्टल आहेत. ही माहिती वरिष्ठ पोलीस निरीक्षक महेश सागडे यांना देण्यात आली. त्यांच्या मार्गदर्शनाखाली पथकाने सापळा रचून नऱ्हे परिसरातून भुषण उत्तम मोहिते याला ताब्यात घेतले. त्याची झडती घेतली असता चार गावठी पिस्टल, त्यांची मॅगझिन आणि तीन जिवंत काडतुसे असा दोन लाखांचा मुद्देमाल जप्त केला.
चौकशीदरम्यान आरोपीने ही पिस्टले महेश कांबळे (रा. गुजरवाडी, पुणे) याच्याकडून विक्रीसाठी आणल्याची कबुली दिली.
याप्रकरणी नऱ्हे पोलीस ठाण्यात गुन्हा दाखल केला आहे. ही कामगिरी पोलीस उपायुक्त गौहर हसन, सहायक पोलिस आयुक्त शैलेश संखे यांच्या मार्गदर्शनाखाली वरिष्ठ पोलीस निरीक्षक महेश सागडे, पोलीस निरीक्षक प्रसन्न जऱ्हाड, पोलीस अंमलदार रणजित फडतरे, रहिम शेख, सोमनाथ कांबळे, बाबासाहेब दांगडे, दयानंद तेलंगे पाटील, सचिन माळवे, प्रमोद पवार, किरण मोरे, सुहास जगताप यांनी केली.
