पोलिसांकडून तिसऱ्या दिवशीही तरुणाची शोधमोहीम
marathinews24.com
पुणे – मूळचा हैद्राबादमधील असलेला तरुण पुण्यातील सिंहगडावरून बुधवारी बेपत्ता झाला आहे. मागील तीन दिवसांपासून त्याचा शोध लागलेला नाही. पोलिसांनी शुक्रवारी सिंहगड किल्ला परिसरात शाेधमोहीम राबविली. मात्र, बेपत्ता तरुणाचा ठावठिकाणा लागला नाही. गौतम गायकवाड (वय २४, रा. हैद्राबाद) असे बेपत्ता झालेल्या तरुणाचे नाव आहे.
खुशखबर…गणेशोत्सवानमित्त गणेशभक्तांच्या वाहनांना टोलमाफी – सविस्तर बातमी
हैद्राबादमधील गौतम त्याची नियोजित पत्नी आणि तीन मित्रांसोबत सिंहगड किल्ला परिसरात बुधवारी (२० ऑगस्ट) पर्यटनासाठी आला होता. तरुण तेथून बेपत्ता झाला. त्याचा शोध घेण्यात आला. मात्र, तो सापडला नाही. त्यानंतर त्याच्याबरोबर असलेल्या मित्रांनी हवेली पोलिसांना या घटनेची महिती दिली. बेपत्ता झालेल्या गौतमचा स्थानिकाच्या मदतीने शोध घेण्यात आला. गेले तीन दिवस तरुणाचा शाेध घेण्यात आला. शुक्रवारी सिंहगड किल्ला परिसरात शोधमोहीम राबविण्यात आली, अशी माहिती हवेली पोलीस ठाण्याचे पोलीस निरीक्षक सचिन वांगडे यांनी दिली.
सिंहगड किल्ला परिसरात वनविभागाकडून सीसीटीव्ही कॅमेरे बसविण्यात आले आहेत. पोलिसांनी सीसीटीव्ही चित्रीकरण तपासले. तेव्हा किल्ल्याच्या परिसरात एक तरुण आढळून आला. पोलिसांनी हे चित्रीकरण तपासले. तरुणाच्या आई-वडिलांना चित्रीकरण दाखविले. बेपत्ता झालेल्या गौतमचे आई-वडील मूळचे सातारा जिल्ह्यातील आहेत. ते कामानिमित्त काही वर्षांपूर्वी हैद्राबादमध्ये स्थायिक झाले. बेपत्ता झालेला गौतम हैद्राबादमध्ये कॅफे चालवितो. त्याचा पोलिसांकडून शोध घेण्यात येत आहे. त्याच्या बेपत्ता होण्यामागचे कारण समजले नाही. सर्व शक्यता गृहित धरून पाेलिसांकडून तपास करण्यात येत आहे.
