जादा परताव्याच्या आमिषापोटी गमावले सव्वा कोटी रूपये
marathinews24.com
पुणे – नागरिकांनो जादा परताव्याची हाव नेहमीच घातक ठरल्याचे अनेक घटनांवरून स्पष्ट झाले आहे. मात्र, तरीही अनेकांना हाव सुटत नसल्याचे फसवणूकीनंतर सिद्ध होत आहे. तोपर्यंत वेळ, पैसा निघून गेलेला असतो. सायबर पोलिसांसह वर्तमानपत्रे, प्रसिद्धी पत्रकाद्वारे जनजागृती करूनही नागरिक सायबर चोरट्यांच्या जाळ्यात अडकत आहेत. त्यासोबतच ते स्वतःसह नातेवाईकांनाही मोहात पाडत असल्याचे दिसून आले आहे.
मनी लॉड्रींग केसच्या बतावणीने जेष्ठाला १९ लाखांचा गंडा – सविस्तर बातमी
शेअर ट्रेडींगमध्ये जादा परतावा मिळवून देण्याचे आमिष दाखवून सायबर चोरट्यांनी पुण्यातील हडपसर परिसरात राहणार्या ४८ वर्षीय नागरिकाला जाळ्यात अडकवले. त्यानंतर संबंधिताने आपल्या नातेवाईकांनाही गुंतवणूकीला भाग पाडले. स्वतःसह साडू, मेव्हणीकडील रक्कम घेउन शेअर मार्केटमध्ये गुंतवली. मात्र, सायबर चोरट्यांनी त्यांना परतावा न देता तब्बल १ कोटी २० लाखांचा गंडा घातला आहे. ही घटना ५ सप्टेंबर ते २० ऑक्टोबर कालावधीत हडपसरमध्ये घडली आहे. याप्रकरणी तक्रारदाराने सायबर पोलीस ठाण्यात तक्रारी अर्ज दाखल केला होता. त्यानुसार संबंधित फसवणूकीबाबत आता सायबर पोलिसांनी गुन्हा दाखल केला आहे.
पोलिसांनी दिलेल्या माहितीनुसार, तक्रारदार हे हडपसर परिसरातील अॅमनोरा रोड परिसरात राहायला आहेत. ५ सप्टेंबरला सायबर चोरट्यांनी त्यांना व्हॉटसअॅप मेसेजद्वारे संपर्क केला. शेअर ट्रेडींगमध्ये गुंतवणूक केल्यास चांगला परतावा मिळवून देतो, अशी बतावणी केली. विश्वास संपादित झाल्यानंतर तक्रारदाराने गुंतवणूकीला सुरूवात केली. स्वतःसह मेव्हणी आणि साडूकडूनही रक्कम शेअर मार्केटमध्ये गुंतवली. त्याबदल्यात रक्कम मिळवण्यासाठी आणखी १० टक्के गुंतवणूक करा, असे सांगण्यात आले. फसवणूक झाल्याचे लक्षात आल्यानंतर संबंधिताने सायबर पोलीस ठाण्यात धाव घेत तक्रार दाखल केली. याप्रकरणी वरिष्ठ पोलीस निरीक्षक स्वप्नाली शिंदे तपास करीत आहेत.
