अज्ञात चोरट्याविरूद्ध गुन्हा दाखल
marathinews24.com
पुणे – बंद फ्लॅटचे कुलूप तोडून चोरट्यांनी ५ लाख ३३ हजारांचा ऐवज चोरून नेला आहे. ही घटना ३ डिसेंबरला सकाळी साडेअकरा ते संध्याकाळी पाच वाजण्याच्या सुमारास कोंढव्यातील लक्ष्मीनगरमध्ये असलेल्या श्रद्ध निवासात घडली आहे. याप्रकरणी संध्या घोडके वय २५ यांनी कोंढवा पोलीस ठाण्यात फिर्याद दाखल केली आहे. त्यानुसार अज्ञात चोरट्याविरूद्ध गुन्हा दाखल करण्यात आला आहे.
दिग्विजयची पोलिसांकडून चौकशी, पार्थवर गुन्हा दाखल होण्याची टांगती तलवार – सविस्तर बातमी
पोलिसांनी दिलेल्या माहितीनुसार, तक्रारदार घोडके कोंढव्यातील लक्ष्मीनगरात राहायला असून, ३ डिसेंबरला सकाळच्या सुमारास त्या कामानिमित्त बाहेर गेल्या होत्या. त्यावेळी चोरट्यांनी त्यांच्या फ्लॅटचे कुलूप तोडून ९ हजारांची रोकड आणि सोन्या-चांदीचे दागिने असा ५ लाख ३३ हजारांचा ऐवज चोरून नेला. संध्याकाळच्या सुमारास घरी आल्यानंतर घोडके यांना घरात चोरी झाल्याचे दिसून आले. त्यानंतर त्यांनी पोलीस ठाण्यात धाव घेतली. याप्रकरणी पोलीस उपनिरीक्षक शिवराज खराडे तपास करीत आहेत.
