विमानतळ पोलिसांनी केली अटक
marathinews24.com
पुणे – खरेदीच्या बहाण्याने सराफी पेढीतून एक लाखांची सोन्याची अंगठी लांबविणाऱ्या एकाला विमानतळ पोलिसांनी अटक केली. विमाननगर भागातील एका प्रसिद्ध सराफी पेढीत ही घटना घडली. सैफ दिलीप बेळगावकर (वय २९, रा. केदारेनगर, वानवडी) याला अटक करण्यात आली. याबाबत सराफी पेढीतील कर्मचाऱ्याने विमानतळ पोलीस ठाण्यात फिर्याद दिली आहे.
खडकवासला भागात फ्लॅटचे कुलूप तोडून ऐवज चोरीला – सविस्तर बातमी
पोलिसांनी दिलेल्या माहितीनुसार, विमाननगर भागात प्रसिद्ध सराफी पेढी आहे. २३ नोव्हेंबर रोजी सायंकाळी साडेसातच्या सुमारास बेळगावकर सराफी पेढीत खरेदीच्या बहाण्याने आला. सराफी पेढीतील कर्मचाऱ्याला सोन्याची अंगठी दाखविण्यास सांगितले. त्यानंतर सराफी पेढीतील बेळगावकरला सोन्याची अंगठी दाखविली. सराफी पेढीतील कर्मचाऱ्याला बोलण्यात गुंतवून बेळगावकरने बनावट सोन्याची अंगठी ट्रेमध्ये ठेवली. त्याऐवजी एक लाख रुपयांची सोन्याची अंगठी चोरली. त्यानंतर अंगठी पसंत नसल्याचे सांगून बेळगावकर सराफी पेढीतून बाहेर पडला.
बेळगावकरने अंगठी ठेवण्याच्या ट्रेमध्ये बनावट सोन्याची अंगठी ठेवल्याचे तपासणीत उघड झाले. पोलिसांना या घटनेची माहिती कळविण्यात आली. पोलिसांनी सराफी पेढीतील चित्रीकरण तपासले. पसार झालेल्या बेळगावकरला पोेलिसांनी अटक केली. वरिष्ठ पोलीस निरीक्षक गोविंद जाधव, गुन्हे शाखेचे निरीक्षक शरद शेळके यांच्या मार्गदर्शनाखाली उपनिरीक्षक नितीन राठोड आणि पथकाने ही कारवाई केली. पोलीस उपनिरीक्षक राठोड तपास करत आहेत.
