न्यायालयाने केली घोषणा
marathinews24.com
पुणे – शहरातील कोथरूड गोळीबार प्रकरणात बनावट कागदपत्रांच्या आधारे पारपत्र मिळवत लंडन गाठणार्या कुख्यात गुंड नीलेश घायवळ याला प्रथमवर्ग न्यायदंडाधिकारी के. पी. जैन-देसर्डा यांनी फरार घोषित केले आहे. त्यामुळे घायवळच्या अडचणीत वाढ झाली आहे. तरूणावर किरकोळ वादातून गोळीबार केल्याप्रकरणी गुन्हा दाखल झाल्यानंतर घायवळने परदेशात पलायन केले आहे.
जादा भाडे देण्याच्या आमिषाने मोटारींची लुट – सविस्तर बातमी
गुंड नीलेश घायवळ याने ९० दिवसांचा व्हिसा मिळवत लंडन गाठले. ब्रिटन उच्चायुक्तालयाशी पत्रव्यवहार झाल्यानंतर घायवळ लंडनमध्ये असल्याचे समोर आले होते. घायवळ व्हिजिटर व्हिसावर लंडमध्ये वास्तव्यास असल्याची माहिती युके हाय कमिशनने पुणे पोलिसांना दिली. दरम्यान, घायवळला फरार घोषित करण्यात यावे, अशी मागणी करणारा अर्ज पुणे पोलिसांनी न्यायालयात दाखल केला होता.
न्यायालयाने पोलिसांचा अर्ज मंजूर करत घायवळ याला फरार घोषित केले आहे. त्यामुळे त्याच्या प्रत्यर्पणाच्या प्रक्रियेचा मार्ग मोकळा झाला असून, कायदेशीर प्रक्रिया पुर्ण करून त्याला लवकरच देशात परत आणण्यात येईल. घायवळविरुद्ध बनावट कागदपत्रांच्या आधारे पारपत्र काढून प्रशासनाची फसवणूक करण्यासह इतर गंभीर गुन्हे त्याच्यावर दाखल आहेत. या प्रकरणांमध्ये न्यायालयाने त्याला फरारी घोषित केले आहे. या निर्णयामुळे त्याची मालमत्ता जप्त करणे शक्य होणार आहे, असे पोलीस उपायुक्त संभाजी कदम यांनी सांगितले आहे.
