मंडल अधिकारी महिलेला घेतले ताब्यात
marathinews24.com
पुणे – Pune ACB Bribery Case : जमिनीच्या सातबारा उताऱ्यावर आणि फेरफार नोंदीवर नावाची नोंद करण्यासाठी तक्रारदाराकडे २० हजार रुपयांच्या लाचेची मागणी केल्याप्रकरणी घोटावडे येथील महिला मंडल अधिकाऱ्याविरुद्ध गुन्हा दाखल करण्यात आला आहे. रोहिणी शशांक गुप्ते (वय ५७, मंडल अधिकारी, घोटावडे, रा. सदाशिव पेठ) असे त्यांचे नाव आहे. तक्रारीच्या पडताळणीदरम्यान त्यांनी स्वतःसाठी पाच हजार रुपयांची लाच मागितल्याचे निष्पन्न झाले. याबाबत ४० वर्षीय नागरिकाने २४ जुलै २०२६ रोजी लाचलुचपत प्रतिबंधक विभागाकडे तक्रार केली होती.
पर्शियन मांजरीची चोरी करून विक्री; ५ जणांवर गुन्हा दाखल – सविस्तर बातमी
तक्रारदार यांनी मोजे केमसेवाडी येथे १२ आर क्षेत्र खरेदी केले होते. या जमिनीच्या सातबारा उताऱ्यावर आणि फेरफार नोंदीवर नोंद केल्याच्या मोबदल्यात मंडल अधिकारी गुप्ते यांनी तक्रारदाराला मोबाइलवरून संपर्क केला होता. या कामासाठी स्वतःसाठी आणि तलाठ्यासाठी प्रत्येकी दोन नोंदींचे पाच-पाच हजार रुपये, असे एकूण २० हजार रुपये देण्याची मागणी त्यांनी केली होती. (Pune ACB Bribery Case) तक्रारीनुसार लाचलुचपत प्रतिबंधक विभागाने २८ जुलै रोजी पडताळणी केली. त्या वेळी पंचांसमक्ष गुप्ते यांनी स्वतःसाठी पाच हजार रुपयांची लाच मागितल्याचे आणि लाचेची रक्कम स्वीकारण्याची तयारी दर्शविल्याचे निष्पन्न झाले. त्यानंतर १२ नोव्हेंबर रोजी पौड पोलिस ठाण्यात भ्रष्टाचार प्रतिबंधक कायद्याच्या कलम सातनुसार गुन्हा दाखल केला.
गुप्ते यांना तपासासाठी ताब्यात घेण्यात आले असून, सूर्यास्त झाल्याने न्यायालयाच्या परवानगीने अटकेची प्रक्रिया सुरू करण्यात आली आहे. पोलिस निरीक्षक प्रवीण निंबाळकर यांनी सापळा अधिकारी म्हणून, तर पोलिस निरीक्षक अशोक गवारी यांनी पर्यवेक्षण अधिकारी म्हणून काम पाहिले. पोलिस उपअधीक्षक सतीश वाळके यांच्या पथकाने ही कारवाई केली. लाचलुचपत प्रतिबंधक विभागाचे पोलिस अधीक्षक शिरीष सरदेशपांडे, अपर पोलिस अधीक्षक अजित पाटील यांच्या मार्गदर्शनाखाली ही कारवाई केली.
