देवघरातून ६४ लाखांचा ऐवज लंपास
marathinews24.com
पुणे – लक्ष्मीपूजनानिमित्त चोरट्यांनी उच्छाद मांडला. शहराच्या वेगवेगळ्या भागात चोरट्यांनी देवघरात ठेवलेले सोन्याचे दागिने, रोकड असा ६४ लाख रुपयांचा ऐवज लांबविला. हडपसर, कात्रज, हडपसरमधील महंमदवाडी, लोणीकंद परिसरातील अष्टापूर, तसेच बिबवेवाडी भागताील सुखसागरनगर भागात या घटना घडल्या.
कौटुंबिक वादातून तरुणाचा खून – सविस्तर बातमी
लक्ष्मीपूजनानिमित्त देवघरात ठेवलेले सोन्याचे दागिने, रोकड असा ४७ लाख रुपयांचा ऐवज लांबविल्याची घटना हडपसर भागात घडली. याबाबत एकाने हडपसर पोलीस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदाराचा हडपसर भागातील अण्णासाहेब मगर महाविद्यालयासमोरील सोसायटीत बंगला आहे. रविवारी (८ नोव्हेंबर) सायंकाळी लक्ष्मीपूजनानिमित्त त्यांनी देवघरात सोन्याचे दागिने आणि १२ लाखांची रोकड ठेवली होती. पूजनासाठी लक्ष्मीहार, गंठण, माळ, कर्णफुले, अंगठी असा ऐवज ठेवला होता. पूजा केल्यानंतर त्यांनी ऐवज देवघरात ठेवला. रात्री तक्रारदार आणि त्याचे कुटुंबीय झोपले. मध्यरात्री बंगल्यात चोरटे शिरले. तळमजल्यावरील खोलीत देवघर आहे. काच सरकवून चोरटे खोलीत शिरले. चोरट्यांनी पूजेत मांडलेले दागिने, १२ लाखांची रोकड चोरून नेली. पोलीस उपनिरीक्षक शुभम शिंदे तपास करत आहेत.
कात्रजमधील संतोषनगर भागातील एका सोसायटीतील घरातून चोरट्यांनी एक लाख ६८ हजार रुपयांचा ऐवज लांबविला. याबाबत एकाने आंबेगाव पोलीस ठाण्यात फिर्याद दिली आहे. त्यांनी दिलेल्या फिर्यादीनुसार, चोरट्यांविरुद्ध गुन्हा दाखल करण्यात आला आहे. पोलिसांनी दिलेल्या माहितीनुसार, तक्रारदार आणि कुटुंबीय हे कात्रजमधील संतोषननगर भागात असलेल्या हनुमान काॅम्प्लेक्स इमारतीत राहायला आहेत. लक्ष्मीपूजनाच्या दिवशी (८ नोव्हेंबर) त्यांनी देवघरात पूजेसाठी दहा हजारांची रोकड आणि सोन्याचे दागिने असा एक लाख ६८ हजार रुपयांचा ऐवज ठेवला होता. सोमवारी (९ नोव्हेंबर) सकाळी सदनिकेचा दरवाजा उघडा होता. दरवाजा उघडा असल्याची संधी साधून चोरट्याने घरात प्रवेश केला. देवघरात ठेवलेले दागिने आणि रोकड लांबवून चोरटा पसार झाला. बिबवेवाडीतील सुखसागरनगर भागात लक्ष्मीपुजनाच्या दिवशी देवघरात ठेवलेले साेन्याचे दागिने, रोकड असा तीन लाख २८ हजार रुपयांचा ऐवज लांबविल्याची घटना घडली. याबाबत एकाने भारती विद्यापीठ पोलीस ठाण्यात फिर्याद दिली आहे. पोलीस उपनिरीक्षक सुर्वे तपास करत आहेत.
पुणे-अहिल्यानगर रस्त्यावरील अष्टापूर गावातील बंगल्यात लक्ष्मीपुजनाच्या दिवशी शिरलेल्या चोरट्यांनी कपाटात ठेवलेली ५० हजारांची रोकड, सोन्याचे दागिने, दुचाकी, मोटारीची चावी असा दोन लाख ६५ हजार रुपयांचा ऐवज लांबविल्याची घटना घडली. याबाबत एकाने लोणीकंद पोलीस ठाण्यात फिर्याद दिली असून, सहायक पोलीस निरीक्षक गजानन कागणे तपास करत आहेत. कोंढव्यातील डाॅ. बाबासाहेब आंबेडकरनगर परिसरात लक्ष्मीपूजनानिमित्त देवघरात ठेवलेले एक लाख ८२ हजार रुपयांचे दागिने चोरट्यांनी चोरुन नेल्याची घटना उघडकीस आली. याबाबत एका ज्येष्ठ महिलेने कोंढवा पोलीस ठाण्यात फिर्याद दिली असून, पोलीस उपनिरीक्षक रमेश शेलार तपास करत आहेत.
हडपसर भागातील काळेपडळ परिसरात देवघरात ठेवलेले एक लाख ८२ हजार रुपयांचे सोन्याचे दागिने चोरुन नेल्याची घटना उघडकीस आली. याबाबत एका महिलेने काळेपडळ पोलीस ठाण्यात फिर्याद दिली आहे. पोलीस कर्मचारी प्रवीण काळभोर तपास करत आहेत. काळपेडळ भागातील महंमदवाडी रस्त्यावरील एका घरात लक्ष्मीपूजनानिमित्त देवघरात ठेवलेले सात लाख ३४ हजार रुपयांचे दागिने चोरट्यांनी लांबविल्याची घटना घडली. याबाबत एका महिलेने काळेपडळ पोलीस ठाण्यात फिर्याद दिली असून, सहायक पोलीस निरीक्षक अमित शेटे तपास करत आहेत.
