सातबाऱ्यावर नाव लावून देण्याच्या बहाण्याने २६ लाखांचा घातला गंडा
marathinews24.com
पुणे – सातबारा उताऱ्यावरुन कमी झालेले नाव पुन्हा लावून देण्याचे आमिष दाखवून एकाची २६ लाख रुपयांची फसवणूक करण्यात आल्याचा प्रकार उघडकीस आला. या प्रकरणी एकाविरुद्ध मांजरी पोलिसांनी गुन्हा दाखल केला. या प्रकरणी प्रसाद उद्धव शिरसाठ (वय ५०) याच्याविरुद्ध गुन्हा दाखल करण्यात आला आहे. याबाबत एकाने मांजरी पोलीस ठाण्यात फिर्याद दिली आहे.
तर भाडेकरूसह घरमालकांविरूद्ध होणार कारवाई – सविस्तर बातमी
पोलिसांनी दिलेल्या माहितीनुसार, तक्रारदार हे पुणे-सोलापूर रस्त्यावरील शेवाळवाडी भागात राहायला आहेत. तक्रारदाराचे नाव वडिलोपार्जित मालमत्तेच्या सातबारा उताऱ्यावरुन कमी झाले होते. आरोपीशी त्यांची २०२२ मध्ये ओळख झाली होती. आरोपीने महसूल विभाग, तसेच जिल्हाधिकारी कार्यालयातील वरिष्ठ अधिकाऱ्यांशी ओळख असल्याची बतावणी केली होती. सातबारा उताऱ्यावरुन कमी झालेले नाव पुन्हा लावून देण्यासाठी पैसे द्यावे लागतील, असे सांगून आरोपीने गेल्या चार वर्षात त्यांच्याकडून वेळोवेळी २६ लाख रुपये रोख स्वरुपात घेतले.
आरोपीने सातबारा उताऱ्यावर नाव न लावून दिल्याने तक्रारदाराने विचारणा केली. तेव्हा आरोपीने उडवाउडवीचे उत्तरे दिली. आरोपीला पैसे परत मागितले. तेव्हा त्याने टाळाटाळ सुरू केली. फसवणूक झाल्याचे लक्षात आल्यानंतर त्यांनी नुकतीच पोलिसांकडे तक्रार दिली. पोलीस उपनिरीक्षक नवनाथ बिनवडे तपास करत आहेत.
