उपसभापती डॉ. नीलम गोऱ्हे यांच्या हस्ते सन्मान
marathinews24.com
मुंबई – देश-विदेशात शिल्पकलेच्या माध्यमातून भारताची कीर्ती उंचावणारे, १०१ वर्षीय ऋषीतुल्य शिल्पकार राम सुतार यांचा विधानपरिषद उपसभापती डॉ. नीलम गोऱ्हे यांच्या हस्ते शाल व पुष्पगुच्छ देऊन विशेष सन्मान करण्यात आला. या वेळी राम सुतार यांचे सुपुत्र अनिल सुतारही उपस्थित होते. राम सुतार यांनी आपल्या प्रदीर्घ कारकिर्दीत पन्नासहून अधिक भव्य शिल्पांची निर्मिती केली आहे. ‘स्टॅच्यू ऑफ युनिटी’सारखा जगप्रसिद्ध प्रकल्प, संसद भवनातील महात्मा गांधींची प्रतिमा तर सरदार वल्लभभाई पटेल, जवाहरलाल नेहरू, गोविंद वल्लभ पंत यांसह अनेक महान नेत्यांची शिल्पकृती त्यांच्या हस्ते साकारली गेली आहे.
शिल्पातील सूक्ष्म मानवी भावना आणि वास्तवदर्शी स्वरूपामुळे त्या कलाकृती इतिहासाची साक्ष देत राहतात. गौरव व्यक्त करताना डॉ. गोऱ्हे म्हणाल्या, “राम सुतार हे फक्त शिल्पकार नाहीत, तर भारताच्या सांस्कृतिक वारशाचे संवाहक आहेत. त्यांनी आपल्या कलेतून देशभक्ती, एकात्मता आणि मानवी मूल्यांचा संदेश दिला आहे. १०१ वर्षांच्या वयातही त्यांचा कलाविष्कार जिवंत आणि प्रेरणादायी आहे, ही आपल्या सर्वांसाठी अभिमानाची बाब आहे. राम सुतार यांना यापूर्वी पद्मश्री (१९९९), पद्मभूषण (२०१६), टागोर पुरस्कार (२०१६) यांसह अनेक राष्ट्रीय आणि आंतरराष्ट्रीय सन्मान प्राप्त झाले आहेत.
