मुलीवर बलात्कारप्रकरणी जन्मदात्यास ७ वर्ष कारावास
marathinews24.com
बीड (अनंत जाधव) – पोटच्या अल्पवयीन मुलीवर नराधम बापानेच वारंवार लैंगिक अत्याचार केल्याप्रकरणी शिरूर पोलीस ठाण्यात गुन्हा दाखल करण्यात आला होता. या प्रकरणात न्यायालयाने साक्षीदार आणि सबळ पुराव्यामुळे आरोपी पित्यास ७ वर्ष सश्रम कारावासाची शिक्षा सुनावली आहे. दरम्यान याप्रकरणाचा शिरूर पोलिसांनी संवेदनशील आणि शिस्तबध्दपणे तपास केला होता. त्यांच्या याच तपासामुळे आरोपीला कठोर शिक्षा मिळाली आहे.
मुलीशी अश्लील कृत्य करणारा रखवालदार गजाआड – सविस्तर बातमी
शिरूर पोलीस ठाण्याच्या हद्दीत १४ वर्षाचा अल्पवयीन मुलीवर जन्मदात्या बापाकडूनच वारंवार अत्याचार सुरु होता. याप्रकरणी १८ ऑगस्ट २०२४ रोजी पीडितेने दिलेल्या तक्रारीवरून नराधम बापावर गुन्हा दाखल करण्यात आला. पोलिसांनी आरोपीला ताब्यात घेऊन त्याच्याविरोधात दोषारोपपत्र न्यायालयात सादर केले होते. तपासादरम्यान पीडितेचा जबाब, साक्षीदारांचे जबाब, महत्वाचे पुरावे पोलीस उपनिरीक्षक धनंजय कुलकर्णी यांनी गोळा केले होते. न्या.एस.एस.घोरपडे (विशेष सत्र न्यायालय) यांनी सर्व पुरावे आणि जबाब ग्राह्य धरत आरोपी बापाला ७ वर्ष सक्तमजुरीची शिक्षा ठोठावली. गुन्ह्यांचा तपास पोलीस उपनिरीक्षक धनंजय कुलकर्णी यांनी वरिष्ठांच्या मार्गदर्शनाखाली केला. सरकारी पक्षातर्फे एस. बी. तिडके यांनी काम केले.
