तब्बल ११ लाख ४५ हजारांची रक्कम केली परत
marathinews24.com
पुणे – जाहिरातीच्या माध्यमातून तरुणाची तब्बल ११ लाख ४५ हजारांची फसवणूक करणाऱ्या महिलेला बिबवेवाडी पोलिसांनी अटक केली. तिच्याकडून रक्कम परत मिळवून दिली आहे. हर्षला राकेश डेंगळे (वय २८, रा. न्यु ओमनगर, हुडकेश्वर, नागपूर) असे अटक केलेल्या महिलेचे नाव आहे.
कोंढव्यात टोळक्याची दहशत; दुकानाची तोडफोड – सविस्तर बातमी
पोलिसांनी दिलेल्या माहितीनुसार, तक्रारदार तरुणाला सकाळ टुडे” वृत्तपत्रात आलेल्या “वर पाहिजे” जाहिरातीमधून महिलेचा मोबाईल क्रमांक मिळाला. त्या क्रमांकावर संपर्क साधताच संबंधित महिलेने आकांक्षा पाटील असे नाव सांगितले. तिने फिर्यादींना दुसऱ्या क्रमांकावर “ममता जोशी” नावाच्या महिलेचा संपर्क क्रमांक दिला. त्यानंतर फिर्यादी आणि ममता जोशी यांच्यात फोनवर सतत संपर्क झाला. दोन्ही महिलांनी तरुणाचा विश्वास संपादन केला. त्यानंतर एकीने मावसभाची आजारी असल्याचे सांगत उपचारासाठी पैशांची गरज असल्याचे तरुणाला सांगितले. त्यानंतर अपघात झाल्याचे सांगून रक्कम मागवली. त्यानुसार तक्रारदाराने तिच्या सांगण्यावरून १८ एप्रिल ते १ जून २०२५ दरम्यान वारंवार यूपीआय आयडीवर ११ लाख ४५ हजार रुपये ऑनलाइनरित्या पाठवले.
फसवणूक झाल्याचे लक्षात आल्यानंतर त्यांनी बिबवेवाडी पोलीस ठाण्यात तक्रार दाखल केली. त्यानुसार माहिती तंत्रज्ञान कायदा कलम ६६(डी) अन्वये गुन्हा नोंद करण्यात आला. तांत्रिक विश्लेषणानंतर आरोपी महिला हर्षला राकेश डेंगळे (वय २८, रा. न्यु ओमनगर, हुडकेश्वर, नागपूर) या महिलेला पोलिसांनी शोधून काढले. पोलिसांच्या चौकशीत तिने गुन्ह्याची कबुली दिली. तिच्याकडून ३ मोबाईल फोन जप्त केले आहेत.
पोलिसांनी १५ ऑक्टोबरला चार्जशीटसह न्यायालयात हजर करण्यात आले असता न्यायालयाने तिला जामिन मंजूर केला. पोलीस निरीक्षक (गुन्हे) सुरज बेंद्रे यांच्यासह अंमलदार संतोष जाधव, विशाल जाधव, मेघा गायकवाड आणि प्रतिक करंजे यांनी महत्त्वाची भूमिका बजावली. ही कारवाई अपर पोलीस आयुक्त मनोज पाटील, पोलीस उपायुक्त राजकुमार शिंदे, सहायक पोलीस आयुक्त धन्यकुमार गोडसे यांच्या मार्गदर्शनाखाली वरिष्ठ पोलीस निरीक्षक अश्विनी सातपुते यांच्या पथकाने केली.
