सायबर चोरट्यांविरुद्ध डेक्कन पोलिसांनी केला गुन्हा दाखल
marathinews24.com
पुणे – सायनसचा त्रास होत असल्याने प्रसिद्ध डाॅक्टरांची ऑनलाइन अपाॅईंटमेंट घेणाऱ्या ज्येष्ठ महिलेची सायबर चोरट्यांनी ५ लाख ५४ हजार रुपयांची फसवणूक केल्याचा प्रकार उघडकीस आला आहे. याप्रकरणी सायबर चोरट्यांविरुद्ध डेक्कन पोलिसांनी गुन्हा दाखल केला आहे. याबाबत ज्येष्ठ महिलेने डेक्कन पोलीस ठाण्यात फिर्याद दिली आहे. त्यांनी दिलेल्या फिर्यादीनुसार सायबर चोरट्यांविरुद्ध गुन्हा दाखल करण्यात आला आहे.
ऑनलाइन टास्कच्या आमिषाने तरुणाची फसवणूक – सविस्तर बातमी
पोलिसांनी दिलेल्या माहितीनुसार, तक्रारदार ज्येष्ठ महिला विधी महाविद्यालय रस्त्यावरील एका सोसायटीत राहायला आहेत. त्यांना सायनसचा त्रास होत आहे. त्यांनी मोबाइलवर या विकारावर उपचार करणाऱ्या डाॅक्टरांची माहिती घेतली. डाॅक्टरांची माहिती घेतल्यानंतर त्यांना एक मोबाइल क्रमांक मिळाला. डाॅक्टरांची अपाॅईंटमेंट घेण्यासाठी त्यांनी संबंधित क्रमांकावर संपर्क साधला. तेव्हा डाॅक्टरांऐवजी तेथे सायबर चोरट्यांनी त्यांचा मोबाइल क्रमांक टाकला होता. सायबर चोरट्यांनी अपाॅईंटमेंट मिळवण्यासाठी सुरुवातीला पाच रुपये ऑनलाइन पद्धतीने पाठविण्यास सांगितले. महिलेने ऑनलाइन पद्धतीने पाच रुपये चोरट्यांच्या खात्यात जमा केले.
महिलेचा मोबाइल क्रमांक बँक खात्याला जोडण्यात आला आहे. चोरट्यांनी महिलेचा मोबाइल क्रमांकाचा तांत्रिक ताबा (हॅक) घेतला. त्यानंतर चोरट्यांनी महिलेच्या बँक खात्यातून ५ लाख ५४ हजार रुपये स्वत:च्या खात्यात हस्तांतरित केले. त्या वेळी कुटुंबियांना संशय आला. चोरट्याने मोबाइल क्रमांक बंद केल्याचे लक्षात आले. फसवणूक झाल्याचे लक्षात आल्यानंतर महिलेने डेक्कन पोलीस ठाण्यात तक्रार दिली. वरिष्ठ पोलीस निरीक्षक गिरीषा निंबाळकर तपास करत आहेत.
