जेसीबी चालकाविरुद्ध कोरेगाव पार्क पोलिसांनी केला गुन्हा दाखल
marathinews24.com
पुणे – जेसीबी यंत्राची लोखंडी बकेट डोक्यात पडून कामगाराचा मृत्यू झाल्याची घटना कोरेगाव पार्क भागात घडली. दुर्घटनेस जबाबदार ठरल्याप्रकरणी जेसीबी चालकाविरुद्ध कोरेगाव पार्क पोलिसांनी गुन्हा दाखल केला.
शाळकरी मुलीवर बलात्कार करणारा अटकेत – सविस्तर बातमी
राहुल अनिल गोसावी (वय ३८, रा. लक्ष्मीनगर, येरवडा) असे मृत्युमुखी पडलेल्या कामगाराचे नाव आहे. अपघातास जबाबदार ठरल्याप्रकरणी जेसीबी चालक अक्षय झोंबाडे (वय २५, रा. ऊरळी कांचन, पुणे-सोलापूर रस्ता) याच्याविरुद्ध गुन्हा दाखल करण्यात आला आहे. याबाबत राहुल गोसावी याची आई कावेरी (वय ५८) यांनी कोरेगाव पार्क पोलीस ठाण्यात फिर्याद दिली आहे.
पोलिसांनी दिलेल्या माहितीनुसार, कोरेगाव पार्क भागातील ‘डम्पिंग ग्राऊंड’ परिसरात राहुल गोसावी काम करत होता. सोमवारी (८ डिसेंबर) दुपारी एकच्या सुमारास काम करत असताना जेसीबी यंत्राची लोखंडी बकेट डोक्यात पडल्याने राहुल गंभीर जखमी झाला. त्याला तातडीने रुग्णालयात दाखल करण्यात आले. उपचारांपूर्वीच त्याचा मृत्यू झाल्याची माहिती डाॅक्टरांनी दिली. सहायक पोलीस निरीक्षक निमकर तपास करत आहेत.
