शरद पवार यांच्या वाढदिवसानिमित्त विविध उपक्रमांचे उद्घाटन
marathinews24.com
पुणे – तरुणाईला स्वयंरोजगार, उद्योगाच्या मोठ्या संधी आहेत. प्रगत तंत्रज्ञान आत्मसात करीत उद्योगाच्या नवनवीन कल्पना सत्यात उतरवण्यासाठी पुढाकार घ्या. उद्योग उभारण्यासाठी शासनाच्या योजना आहेत. स्टार्टअप इंडिया, स्टँडअप इंडियासारख्या उपक्रमांतून अनुदान देत उद्योग उभारण्याला चालना दिली जात आहे, त्याचा लाभ तरुणांनी घ्यावा,” असे मत उद्योग मार्गदर्शक हर्षवर्धन रानडे यांनी व्यक्त केले.
राष्ट्रवादी काँग्रेस (शरदचंद्र पवार) पक्षाचे राष्ट्रीय अध्यक्ष व माजी केंद्रीय मंत्री शरदचंद्र पवार यांच्या वाढदिवसानिमित्त खडकवासला विधानसभा मतदारसंघ व प्रभाग क्रमांक ३४ च्या वतीने आयोजित उद्योजकता विकास मेळावा, क्रिकेट स्पर्धा, विद्यार्थ्यांसाठी शैक्षणिक सहल, चित्रकला स्पर्धा, निबंध स्पर्धा आदी सामाजिक उपक्रमांच्या उद्घाटनावेळी रानडे बोलत होते. यावेळी राम माळी, सुभाष हगवणे, राजेश जाधव आणि आनंद जोशी यांना उत्कृष्ट व्यावसायिक पुरस्कार यांना देण्यात आले.
प्रसंगी ‘राष्ट्रवादी’च्या महिला शहाराध्यक्षा स्वाती पोकळे, खडकवासला विधानसभा मतदारसंघाचे अध्यक्ष काकासाहेब चव्हाण, ओबीसी प्रदेशाध्यक्ष मंजिरी घाडगे, पंचायत समितीच्या माजी सभापती प्रभावती भूमकर, माजी जिल्हा परिषद सदस्य सुरेखाताई दमिष्टे, नऱ्हे गावचे माजी सरपंच पोपट खेडेकर, खडकवासला मतदार संघाचे युवक अध्यक्ष शरद दबडे, सोशल मीडिया सेलचे अध्यक्ष निलेश दमिष्टे, सचिन बेनकर, सुरेश परकड आदी मान्यवर उपस्थित होते.
सुरेखाताई दमिष्टे म्हणाल्या, “देशाचे नेते शरद पवार साहेबांच्या वाढदिवसा निमित्त गेल्या ३० वर्षांपासून या उपक्रमांचे आयोजन केले जाते. देशात बेरोजगारांची संख्या मोठी आहे. तसेच अलीकडे स्टार्टअप संस्कृती विकसित होत आहे. त्यामुळे समाजातील तरुणांमधील उद्योजक घडवण्यासाठी व्यावसायिक मेळाव्याचे आयोजन केले आहे. तरुणांचा मोठा प्रतिसाद या मेळाव्याला मिळाला.”
“शिवाजीनगर येथील एव्हिएशन गॅलरी, पर्वती येथील क्रिकेट संग्रहालय येथे विद्यार्थ्यांसाठी शैक्षणिक सहल, वडगाव आणि धायरी येथील क्रीडांगणावर क्रिकेट स्पर्धा, विविध शाळांमध्ये निबंध स्पर्धा घेण्यात आली,” असे निलेश दमिष्टे यांनी नमूद केले.
