सायबर पोलिसांकडून गुन्हा दाखल
marathinews24.com
पुणे – ऑनलाइन ट्रेडिंगमध्ये नफा मिळवून देण्याचे आमिष दाखवत सायबर चोरट्यांनी एकाची ६२ लाख ९० हजार रुपयांची फसवणूक केल्याचा प्रकार उघडकीस आला आहे. याप्रकरणी सायबर पोलिसांकडून गुन्हा दाखल करण्यात आला आहे. राजेश सुधाकर सोवळे (वय ४०, रा. साईशिल्प बिल्डिंग, साईनगरी, चंदननगर) यांनी तक्रार दिली आहे. त्यानुसार अज्ञात मोबाइल धारक, विविध बँक खातेधारक तसेच लिंकद्वारे व्यवहार करणाऱ्या संबंधितांवर गुन्हा नोंदविला आहे. आरोपींना अद्याप अटक करण्यात आली नाही.
बँकेतील आरटीजीएस फॉर्म चोरून फेरफार – सविस्तर बातमी
पोलिसांनी दिलेल्या माहितीनुसार, सायबर चोरट्यांनी तक्रारदाराशी संपर्क साधून शेअर मार्केटमध्ये गुंतवणूक केल्यास मोठा परतावा मिळेल, असे आमिष दाखवले. २८ डिसेंबर २०२५ ते ३ फेब्रुवारी २०२६ कालावधीत विश्वास संपादन करत तक्रारदाराला विविध लिंक पाठवल्या. वेगवेगळ्या बँक खात्यांमध्ये रक्कम जमा करण्यास प्रवृत्त केले. तक्रारदाराने त्यांच्या सांगण्यावरून टप्प्याटप्प्याने ६२ लाख ९० हजार रुपये भरले. मात्र त्यानंतर कोणताही परतावा न मिळाल्याने फसवणूक झाल्याचे स्पष्ट झाले. या प्रकरणी भारतीय न्याय संहितेच्या कलमांसह माहिती तंत्रज्ञान कायद्याच्या कलम ६६(डी) अंतर्गत गुन्हा दाखल केला असून पुढील तपास सुरू आहे.
