खडक पोलिसांची कामगिरी
marathinews24.com
पुणे – नशेसाठी वापरल्या जाणाऱ्या तब्बल ६ हजार ९०० गुंगीकारक औषधी गोळ्या खडक पोलिसांनी जप्त केल्या आहेत. या गोळ्या उत्तर प्रदेश येथून कुरिअरद्वारे मागवून पुणे शहरातील विविध परिसरात विक्री करत असल्याची धक्कादायक माहिती उघडकीस आली आहे. याप्रकरणी खडक पोलीस ठाण्यात गुन्हा दाखल करण्यात आला आहे.
सोनसाखळ्या हिसकावणारा सराईत जेरबंद = सविस्तर बातमी
समीर हमीद शेख (वय ४०, रा. साईनगर, कोंढवा) आणि सुनील गजानन शर्मा (वय ३४, रा. सुखसागरनगर, कोंढवा) अशी अटक करण्यात आलेल्या आरोपींची नावे आहेत.
पोलिसांनी दिलेल्या माहितीनुसार,नशेसाठी वापरल्या जाणाऱ्या गोळ्यांची विक्री करण्यासाठी दोघेजण स्वारगेट परिसरात येणार असल्याची माहिती खडक पोलिस ठाण्याचे कर्मचारी आशिष चव्हाण यांना मिळाली. त्यानुसार २५ नोव्हेंबरला मध्यरात्री दीडच्या सुमारास पोलिसांनी दुचाकीवरून जाणाऱ्या दोघांना अडवले. त्यांची झडती घेतली असता ते गुंगीच्या औषधाची विक्री करत असल्याचे आढळून आले. त्यांच्या दुचाकीच्या डिक्कीमध्ये तसेच कोंढवा येथील राहत्या घरात नायट्राझेपॅम टॅब्लेट आयपी नित्झास्केन -१०, अल्प्राझोलम टॅब्लेट आय.पी ०.५ मिग्रॅ, अल्प्राझेन -०.५, नायट्राझेपॅम टॅब्लेट आयपी नित्झास्केन -१० या अंमली पदार्थाच्या एकूण ६ हजार ९०० गोळ्या मिळून आल्या आहेत.
आरोपींकडून पोलिसांनी अंमली पदार्थाच्या गोळ्या आणि दुचाकी असा दीड लाख रुपये किमतीचा मुद्देमाल ताब्यात घेतला आहे. अंमली पदार्थ असलेल्या औषधी गोळ्या विनापरवाना व डॉक्टरांच्या प्रिस्क्रिपशनशिवाय नशेसाठी खरेदी-विक्री करण्याच्या उद्देशाने बाळगताना मिळून आल्याप्रकरणी दोघांवर गुन्हा दाखल करण्यात आला आहे. आरोपी हे वेगवेगळ्या ठिकाणाहून औषधसाठा मागवत असल्याचे व कोंढवा, काशेवाडी, हडपसर, कॅम्प, येरवडा परीसरात नशेसाठी गोळ्यांची विक्री करत असल्याचे दिसून आल्याची माहिती पोलिसांनी दिली. पुढील तपास सहायक पोलिस निरीक्षक अर्जुन कुदळे करत आहेत. ही कामगिरी पोलीस उपायुक्त कृषिकेश रावले, वरिष्ठ पोलिस निरीक्षक शशिकांत चव्हाण, पोलिस निरीक्षक शर्मिला सुतार, सहायक पोलीस निरीक्षक मनोजकुमार लोंढे यांच्यासह पथकाने केली.
