साडेआठ हजारांची रोकड आणि चांदीच्या वस्तू असा मुद्देमाल केला जप्त
marathinews24.com
पुणे – सनदी लेखापालाच्या कार्यालयात चोरी करुन पसार झालेल्या चोरट्यांना गुन्हे शाखेने अटक केली. त्यांच्याकडून साडेआठ हजारांची रोकड आणि चांदीच्या वस्तू असा मुद्देमाल जप्त करण्यात आला. निखील विजय पवार (वय १९), अनुराग विजय पवार (वय २१, रा. सरगम चाळ, बिबवेवाडी-गंगाधाम रस्ता) अशी अटक करण्यात आलेल्यांची नावे आहेत. आरोपी सख्खे भाऊ आहेत.
मिठाई दुकानाचे शटर उचकटले, ३५ हजारांची रोकड चोरीला – सविस्तर बातमी
गुलटेकडीतील गिरीधर भवन चाैकातील एका सनदी लेखापालाच्या कार्यालयात १९ सप्टेंबरला मध्यरात्री चोरटे शिरले. चोरट्यांनी कार्यालयाचे दरवाजा उचकटून आत प्रवेश केला. कप्प्यातील रोकड, चांदीच्या वस्तू असा मुद्देमाल चोरून दोघे जण पसार झाले. या प्रकरणी चोरट्यांविरुद्ध स्वारगेट पोलीस ठाण्यात गुन्हा दाखल करण्यात आला होता. पोलिसांनी या भागतीलल सीसीटीव्ही कॅमेऱ्यांनी केलेले चित्रीकरण तपासले होते. गुन्हे शाखेच्या युनिट दोनमधील पोलीस कर्मचारी अमोल रसाळ, उज्वल मोकाशी, शंकर नेवसे, संजय जाधव यांना सराइत चोरटे पवार यांनी सनदी लेखापालाच्या कार्यालयात चोरी केल्याची माहिती मिळाली. त्यानंतर पोलिसांच्या पथकाने सापळा लावून दोघांना ताब्यात घेतले.
पोलीस उपायुक्त निखील पिंगळे, सहायक आयुक्त विजय कुंभार यांच्या मार्गदर्शनाखाली पोलीस निरीक्षक अंजुम बागवान, सहायक निरीक्षक रसाळ, आशिष कवठेकर, पोलीस कर्मचारी जाधव, नेवसे, पवार, टकले, चव्हाण, सरडे, आबनावे यांनी ही कामगिरी केली.
