धायरी फाटा परिसरातील गणेश मंगल कार्यालयाजवळ घडली होती घटना
marathinews24.com
पुणे – भरधाव डंपर चालकाने दिलेल्या धडकेत गंभीररित्या जखमी झालेला पादचारी तरूण ठार झाला आहे. ही घटना २८ फेबु्रवारीला सकाळी सव्वा नउच्या सुमारास धायरी फाटा परिसरातील गणेश मंगल कार्यालयाजवळ घडली होती. बजरंग विश्वभंर येवते (वय ३४, रा. नांदेडगाव, पुणे) असे ठार झालेल्याचे नाव आहे. याप्रकरणी रावसाहेब येवते (वय २८ रा. निलंगा, लातूर) यांनी नांदेडसिटी पोलीस ठाण्यात फिर्याद दाखल केली आहे.
पुण्यातील नवले पूल परिसरात पुन्हा अपघात – सविस्तर बातमी
पोलिसांनी दिलेल्या माहितीनुसार, बजरंग येवते हे मूळचे निलंगा तालुक्यातील असून कामानिमित्त नांदेडगावात राहायला होते. २८ फेबु्रवारीला सकाळी नउच्या सुमारास ते पायी रोडच्या बाजूने जात होते. त्यावेळी पाठीमागून भरधाव वेगात आलेल्या डंपर चालकाने त्यांना गंभीररित्या जखमी केले. उपचारादरम्यान नुकतेच त्यांचे निधन झाले. दरम्यान, अपघातास कारणीभूत ठरलेल्या डंपर चालकाचा पोलिसांकडून शोध घेतला जात आहे. पोलीस अमलदार राहूल गायकवाड तपास करीत आहेत.
रिक्षाच्या धडकेत दुचाकीस्वार जेष्ठ ठार
रिक्षा चालकाने दिलेल्या धडकेत गंभीररित्या जखमी झालेल्या दुचाकीस्वार जेष्ठ नागरिकाचा मृत्यू झाला आहे. ही घटना ५ मार्चला दुपारी अकराच्या सुमारास कोंढवा फायरब्रिगेडजवळ घडली आहे. मुखत्तार अहमद मेहबूबसाहेब शेख (वय ६५ रा. कोंढवा) असे ठार झालेल्या जेष्ठाचे नाव आहे. याप्रकरणी मोहम्मद मुखत्तार अहमद शेख (वय ३४ रा. वडगाव शेरी ) यांनी कोंढवा पोलीस ठाण्यात फिर्याद दाखल केली आहे. सहायक पोलीस निरीक्षक सचिन थोरात तपास करीत आहेत.
