कामाचे आमिष दाखवत महिलेची ऑनलाईन फसवणूक
marathinews24.com
पुणे – घरातून ऑनलाइन पद्धतीने कामाची संधी असे आमिष दाखवून सायबर चोरट्यांनी कात्रज भागातील एका महिलेची १४ लाख २५ हजार रुपयांची फसवणूक केली. याप्रकरण चोरट्यांविरुद्ध आंबेगाव पोलिसांनी गुन्हा दाखल केला.
पुणे : ज्येष्ठ महिलेचे मंगळसूत्र हिसकावून नेले – सविस्तर बातमी
याबाबत एका महिलेने आंबेगाव पोलीस ठाण्यात फिर्याद दिली आहे. तक्रारादार महिला आंबेगाव खुर्द परिसरात राहायला आहेत. सायबर चोरट्यांनी त्यांना गेल्या वर्षी संदेश पाठविला होता. ऑनलाइन पद्धतीने घरातून काम केल्यास दररोज दोन ते तीन हजार रुपये मिळतात. समाज माध्यमातील चित्रफिती, तसेच मजकुरास दर्शक पसंती मिळवून दिल्यास चांगला परतावा मिळेल, असे आमिष दाखवून चोरट्यांनी महिलेला जाळ्यात ओढले. त्यानंतर चोरट्यांनी महिलेला ऑनलाइन काम (ऑनलाइन टास्क) दिले. महिलेने काम पूर्ण केल्यानंतर चोरट्यांनी तिला परताव्यापोटी चार हजार ९२० रुपये दिले. त्यामुळे महिलेचा विश्वास बसला.
ऑनलाइन टास्कमध्ये आणखी रक्कम गुंतविल्यास चांगला परतावा मिळेल, असे आमिष दाखवून चोरट्यांनी महिलेला जाळ्यात ओढले. महिलेने चोरट्यांच्या बँक खात्यात गेल्या सात ते आठ महिन्यात वेळोवेळी १४ लाख २५ हजार रुपये गुंतविले. पैसे गुंतविल्यानंतर चोरट्यांनी महिलेला परतावा दिला नाही. फसवणूक झाल्याचे लक्षात आल्यानंतर महिलेने नुकतीच पोलिसांकडे तक्रार दिली. वरिष्ठ पोलीस निरीक्षक शरद झिणे तपास करत आहेत.
