खराडी पोलिसांची कारवाई
marathinews24.com
पुणे – तरुणाचा खून करुन मृतदेह नदीपात्रात टाकून पसार झालेल्या आरोपीला खराडी पोलिसांनी अटक केली. खून प्रकरणात आरोपी गेले सहा वर्ष पोलिसांना गुंगारा देत होता. तेजस अमृत ढेरे (वय ३६, रा. अलका उत्तम बिल्डिंग, दत्त चौक, मुंढवा) असे अटक करण्यात आलेल्याचे नाव आहे. आरोपी तेजस हा सराईत असून, त्याच्याविरुद्ध खडक, शिरुर, मुंढवा, चंदननगर पोलीस ठाण्यात गंभीर स्वरुपाचे गुन्हे दाखल झाले आहेत.
पुण्यातील बुधवार पेठेत पुन्हा कोम्बिंग ऑपरेशन – सविस्तर बातमी
राहुल शिवाजी शेलार (वय २४, रा. दातेवाडी, ता. खटाव, जि. सातारा) याच्यावर तीक्ष्ण शस्त्राने वार करुन खून करण्यात आला आहे. पुरावा नष्ट करण्यासाठी आरोपींनी शेलार याचा मृतदेह नदीपात्रात टाकून दिला होता. ही घटना चंदननगर पोलीस ठाण्याच्या हद्दीत २०१९ मध्ये घडली होती. शेलारच्या मित्राने फिर्याद दिली आहे. शेलार याच्या खून प्रकरणात आठ आरोपींविरुद्ध गुन्हा दाखल केला होता. शेलार हा खराडीतील एका लाॅजमध्ये थांबला होता. त्यावेळी आरोपी ढेरे आणि साथीदारांनी बाहेर फिरायला जायचे आहे, असे सांगून त्याचा खून केला होता. आरोपींनी या प्रकरणातील फिर्यादीला धमकावून त्याच्याकडील दोन मोबाइल, सोनसाखळी, सोन्याचे कडे, घड्याळ, मोटार असा ३ लाख ६५ हजार रुपयांचा मुद्देमाल लुटून नेला होता. प्रकरणात सात आरोपींना अटक करण्यात आली होती.
मुख्य आरोपी तेजस ढेरे हा पसार झाला होता. ढेरे हा गेले सहा वर्ष पोलिसांना गुंगारा देत होता. तो खराडी परिसरात २५ एप्रिलला पहाटे तीनच्या सुमारास येणार असल्याची माहिती तपास पथकातील पोलीस कर्मचारी दत्तात्रय खरपुडे, अशोक केदार यांना मिळाली. त्यानंतर पोलिसांच्या पथकाने सापळा लावून त्याला पकडले. त्याच्याकडून एक मोटार जप्त केली. पोलीस उपायुक्त सोमय मुंडे यांच्या मार्गदर्शनाखाली वरिष्ठ पोलीस निरीक्षक संजय चव्हाण, सहायक निरीक्षक रवींद्र चव्हाण, उपनिरीक्षक राहुल काेळपे, दत्तात्रय खरपुडे, अशोक केदार, महेश नाणेकर, श्रीकांत कोद्रे, सूरज जाधव, विलास केदारी, साहेबराव गुंडाळे यांनी ही कारवाई केली.
