कोंढाव्यातील मीठानगर भागात संशयितांच्या घरांवर छापे
marathinews24.com
पुणे – राज्य दहशतवाद विरोधी पथकाने (एटीएस) गुरुवारी (दि.९) सकाळी कोंढाव्यात छापे टाकली. मीठानगर भागातील संशयितांच्या घरांवर छापे टाकण्यात आले. एटीएसच्या पथकाने काही संशयितांना ताब्यात घेतल्याची माहिती सूत्रांनी दिली. संभाव्य घातपाती कारवायांच्या पार्श्वभूमीवर एटीएससह तपास यंत्रणांनी गुरुवारी सकाळपासून कोंढव्यातील मीठानगर परिसरात छापे टाकले. या कारवाईत एटीएसने संशयितांना ताब्यात घेतली, तसेच त्यांच्या घरातून काही कागदपत्रे, अन्य मुद्देमाल जप्त केला. कारवाई सुरू असताना मीठानगर भागात मोठा बंदोबस्त ठेवण्यात आला होता, अशी माहिती सूत्रांनी दिली.
विद्यार्थी वाहतूक करणाऱ्या बसचा अपघात; ८ विद्यार्थी जखमी – सविस्तर बातमी
पुण्यात २०२३ मध्ये पकडलेल्या ‘आयसीस’च्या दहशतवाद्यांनी मुंबई, पुणे, तसेच गुजरातमधील प्रमुख शहरात बाॅम्बस्फाेट घडवून आणण्याचा कट रचला होता. कोल्हापूर, सातारा जिल्ह्यातील जंगलात त्यांनी बाॅम्बस्फोटाची चाचणी केली होती. पुण्यातील कोंढवा भागात त्यांनी बाॅम्ब तयार करण्याचे प्रशिक्षण घेतल्याचे तपासात उघडकीस आले होते. मोहम्मद शहानाझ आलम, रिजवान अली, अब्दुलाह शेख, तलाह लियाकत खान, मोहम्मद इम्रान मोहम्मद युसुफ खान उर्फ मटका उर्फ अमीर अब्दुल हमिद खान (रा. रतलाम, मध्य प्रदेश), मोहम्मद युनुस मोहम्मद याकुब साकी उर्फ अदिल उर्फ अदिल सलीम खान (रा. रतलाम, मध्य प्रदेश), कादीर दस्तगिर पठाण उर्फ अब्दुल कादीर, समीब नासीरउद्दीन काझी (दोघे रा. कोंढवा, पुणे), जुल्फीकार अली बडोदवाला उर्फ लालाभाई उर्फ लाला उर्फ सईफ, शमिल साकिब नाचन आणि आकिफ अतिक नाचन (तिघेही रा. पडघा, ठाणे) यांना अटक केली होती.
मोहम्मद आलमला कोथरूड परिसरात दुचाकी चोरताना पोलिसांनी पकडले होते. त्यावेळी त्याच्याबरोबर असलेल्या साथीदारांना पकडण्यात आले होते. तपासासाठी मोहम्मदला कोंढव्यात नेण्यात आले होते. तेव्हा तो पसार झाला होता. २ नोव्हेंबर २०२३ रोजी दिल्ली पोलिसांच्या स्पेशल सेलने त्याला पकडले होते. या प्रकरणी राष्ट्रीय तपास यंत्रणेने (एनआयए) मुंबईतील विशेष न्यायालयात आरोपपत्र दाखल केले होते.
