गाडी जप्तीसह होतायेत गुन्हे दाखल
marathinews24.com
पुणे – बुलेटच्या सायलेन्सरमध्ये फेरफार करून फटाक्यांसारखे आवाज काढणार्या बुलेटरांजाविरुद्ध पुणे पोलिसांनी कारवाईचा बडगा उगारला आहे. त्यासोबतच हॉर्नमध्ये फेरफार करणार्या दुुकानदारांविरूद्धही मोहिम हाती घेतली आहे. नुकतेच हडपसरमधील ससाणेनगर परिसरात पोलिसांनी कारवाई करीत बुलेट चालकांविरुद्ध मोटार वाहन कायद्यान्वये काळेपडळ पोलीस गुन्हा दाखल केला आहे.
काय सांगता…अवघ्या १८ दिवसांत घटस्फोट मंजूर – सविस्तर बातमी
बुलेटच्या सायलेन्सरमध्ये फेरफार करीत फटाक्यांसारखे आवाज काढणे संबंधितांना भोवले आहे. त्यासोबतच वारजे माळवाडी, स्वारगेट वेगा सेंटर परिसरातील हॉर्न बसवणारे दुकानदार पोलिसांच्या रडारवर आले आहेत. संबंधित दुकानदारांकडे पोलिसांनी चौकशीचा ससेमिरा सुरू केला असून, जर यापुढे बुलेट अथवा इतर वाहनांच्या हॉर्नमध्ये बदल केल्यास थेट गुन्हा दाखल करण्याचा इशारा संबंधितांना देण्यात आला आहे. त्याशिवाय वाहन परवाना, तसेच दुचाकीची कागदपत्रेही न बाळगणे, हॉर्नद्वारे फटाक्यांसारखे आवाज काढणार्याविरूद्ध गुन्हा दाखल केल्यामुळे दुचाकीस्वारांमध्ये धास्ती निर्माण झाली आहे.
आठवड्याभरात १५० हून अधिक बुलेटराजा जाळ्यात
शहरातील विविध भागात बेशिस्तपणे वाहन चालवणार्यांविरूद्ध वाहतूक पोलिसांनी कारवाईचा बडगा उगारला आहे. विशेषतः मॉडीफाईड बुलेटराजांविरूद्ध वाहन जप्तीसह दंडात्मक कारवाईला वेग आला आहे. मागील आठवड्याभरात तब्बल १५० पेक्षा जास्त बुलेटस्वार वाहतूक पोलिसांच्या जाळ्यात अडकले आहेत. त्यांनी हॉर्नसह सायलेन्सरमध्ये बदल केल्याचे कारवाईतून स्पष्ट झाले आहे.
