खोटी माहिती देऊन दिशाभूल केल्याबद्दल तरुणावर गुन्हा दाखल
marathinews24.com
पुणे – सासरच्या छळाला कंटाळून वैष्णवी हगवणे हिने आत्महत्या प्रकरणात फरार असलेला संशयित निलेश चव्हाण याला पकडले असून त्याच्याकडे २ पिस्टल मिळाले आहेत. त्याला मारहाण करुन गाडीच्या डिकीत घातले आहे, असा फोन पुणे पोलिस नियंत्रण कक्षाला येताच पोलिसांची धावपळ उडाली.
मुलींची छेड काढण्यावरुन महिलेने तरुणाच्या कानाचा घेतला चावा – सविस्तर बातमी
प्रत्यक्षात माहिती दिली तर पैसे मिळतील, या आशेने संबंधिताने फोन केल्याचे उघडकीस आले. पोलिसांना खोटी माहिती देऊन दिशाभूल केल्याबद्दल नांदेड सिटी पोलिसांनी तरुणावर गुन्हा दाखल केला. संतोष गायकवाड ( वय ३२, रा. नांदेड गाव, पुणे ) असे गुन्हा दाखल झालेल्याचे नाव आहे.
वैष्णवीचे ९ महिन्याचे बाळ आरोपी निलेश चव्हाणकडे असताना वैष्णवीचे आई-वडिल हे बाळ आणण्यासाठी त्याच्याकडे गेले होते. त्यावेळी त्याने त्यांना पिस्तुलाचा धाक दाखवून हाकलून लावले होते. त्यावरून वारजे माळवाडी पोलिस ठाण्यात चव्हाण विरोधात गुन्हा दाखल केला आहे. तेव्हापासून तो फरार आहे.
नांदेड सिटी पोलिस ठाण्याचे वरिष्ठ पोलिस निरीक्षक अतुल बोस यांनी सांगितले की, पोलिस नियंत्रण कक्षाला बुधवारी सायंकाळी पाचच्या सुमारास फोन आला. फरार नीलेश चव्हाण याला पकडले आहे. त्याच्याकडे २ पिस्टल मिळाले आहेत. त्याला मारहाण करुन गाडीच्या डिकीत ठेवल्याचे फोनकर्त्याने सांगितले. तो कुठे आहे असे विचारल्यावर किरकटवाडी येथे असल्याचे सांगितले. लगेचच नांदेड सिटी पोलिस ठाण्याचे पथक तेथे गेले. त्यांनी संतोष गायकवाड याच्याकडे चौकशी केली. तेव्हा त्याने पैशांची मागणी केली.
पैसे दिले की त्याची माहिती देतो, असे तो सांगत होता. पोलिसांना त्याच्यावर संशय आल्याने त्याला पोलिस ठाण्यात आणले. त्याच्याकडे चौकशी केल्यावर त्याने कोणालाही पकडले नसून, पोलिस पैसे देतील, असे वाटल्याने फोन केल्याचे सांगितले. पोलिस यंत्रणेचा दुरुपयोग करुन खोटी माहिती दिल्याने त्याच्यावर गुन्हा दाखल केला आहे.
