केअर इंडिया मेडिकल सोसायटीचा उपक्रम
marathinews24.com
पुणे – Diwali With A Purpose Pune : दिवाळी म्हणजे आनंद, उत्साह आणि आपुलकीचा सण. या सणाचा आनंद समाजातील प्रत्येक घटकापर्यंत पोहोचावा, या भावनेतून केअर इंडिया मेडिकल सोसायटी (विश्रांती हॉस्पिटल) यांच्या वतीने कर्करोगग्रस्त रुग्ण आणि त्यांच्या कुटुंबीयांसाठी ‘दिवाळी विथ अ पर्पज’ या विशेष उपक्रमाचे आयोजन करण्यात आले आहे. शनिवार (दि.१४) सकाळी साडे दहा वाजता कमांड हॉस्पिटल संकुलातील चरक सभागृहात हा कार्यक्रम होणार आहे.
शेतकऱ्याचा बाप सरणावर, सरकार उत्सवाच्या तयारीत – सविस्तर बातमी
कर्करोगग्रस्त रुग्णांना वैद्यकीय उपचारांसोबतच मानसिक आणि भावनिक आधार मिळावा, त्यांच्यामध्ये सकारात्मकता निर्माण व्हावी तसेच रुग्णालयाकडून दिल्या जाणाऱ्या वैद्यकीय सेवांबाबत त्यांचे प्रत्यक्ष अनुभव आणि अभिप्राय जाणून घेता यावेत, हा या उपक्रमाचा मुख्य उद्देश आहे. (Diwali With A Purpose Pune) या निमित्ताने रुग्णांशी संवाद साधून त्यांना आपले अनुभव मांडण्याची संधी देण्यात येणार असून, कर्करोगाशी संघर्ष करताना त्यांनी दाखविलेल्या धैर्याचा, जिद्दीचा आणि आत्मविश्वासाचा सन्मान करण्यात येणार आहे. कार्यक्रमाला सशस्त्र सेना वैद्यकीय महाविद्यालय, पुणेचे संचालक व कमांडंट सर्ज व्हाइस अॅडमिरल मनीष होनवाड (विशिष्ट सेवा पदक), महाविद्यालयाचे अधिष्ठाता व उपकमांडंट मेजर जनरल अतुल सेठ (विशिष्ट सेवा पदक) तसेच कमांड हॉस्पिटल (दक्षिण विभाग), पुणेचे कमांडंट मेजर जनरल सनिल मोहन यांची प्रमुख उपस्थिती असणार आहे.
निवृत्त लेफ्टनंट जनरल एम. ए. तुतकणे, निवृत्त कर्नल एन. एस. न्यायापती, विश्वस्त मंडळाचे सदस्य, ब्रिगेडियर एल. व्ही. सदाशिवन तसेच केअर इंडिया मेडिकल सोसायटीचे पदाधिकारी आणि कर्मचारी उपस्थित राहणार आहेत. उपक्रमाच्या माध्यमातून कर्करोगग्रस्त रुग्णांच्या जीवनात आनंद, आशा आणि आत्मविश्वास निर्माण करण्यासोबतच त्यांच्या भावनिक गरजा समजून घेण्याचा केअर इंडिया मेडिकल सोसायटीचा प्रयत्न आहे. दिवाळीच्या निमित्ताने आयोजित हा उपक्रम माणुसकी, संवेदनशीलता आणि सामाजिक बांधिलकीचा संदेश देणारा ठरणार आहे.
