नरेश अरोरा यांनी पत्रकार परिषदेत दिली माहिती
marathinews24.com
पुणे – आमच्या कार्यालयात नेमके कोणते कामकाज चालते, तसेच राष्ट्रवादी काँग्रेस पक्षाशी संबंधित कोणती कामे होतात, याबाबत पुणे पोलिसांनी माहिती घेतली. काही कागदपत्रांबाबत विचारणा केली असली तरी प्रत्यक्षात कोणतीही कागदपत्रे जप्त केली नाहीत, असे नरेश अरोरा यांनी पत्रकार परिषदेत सांगितले आहे.
उपमुख्यमंत्री अजित पवार यांच्या राजकीय सल्लागाराच्या कंपनीची झाडाझडती – सविस्तर बातमी
अरोरा म्हणाले, पोलिसांकडे तक्रार प्राप्त झाली होती. त्या तक्रारीत नमूद मोबाईल क्रमांकावर पोलिसांनी संपर्क साधण्याचा प्रयत्न केला; मात्र संबंधित व्यक्ती सध्या फोन उचलत नसल्याचे सांगण्यात आले. “आम्ही पोलिसांना पूर्ण सहकार्य करणार आहोत. चौकशीसाठी आलेल्या अधिकाऱ्यांनी काही प्रश्न विचारत माहिती घेतली. मात्र ते कोणतीही वस्तू किंवा कागदपत्रे घेऊन गेले नाहीत.” अधिकाऱ्यांना दिलेल्या माहितीवर ते समाधान व्यक्त केले. “मी स्वतः राजकीय व्यक्ती नसून, गेले १० वर्षे मी काम करत असून कधीही चुकीचे काम केलेले नाही. मी नेहमी सकारात्मक आणि कायदेशीर पद्धतीनेच काम करतो,” असेही त्यांनी सांगितले.
“जर बेकायदेशीर आर्थिक व्यवहार किंवा पैसे वाटप होत असते, तर पोलिसांना काहीतरी सापडले असते. मात्र तसे काहीही आढळून आलेले नाही,” असा ठाम दावा त्यांनी केला. चौकशीसाठी अधिकृतपणे बोलावण्यात आलेले नसल्याचेही त्यांनी नमूद केले. पोलीस आयुक्तांशी थेट कोणतेही संभाषण झाले नाही, “हे पहिल्यांदाच आमच्याबाबत घडलेले नाही. राजकीय काम करताना अशा प्रकारच्या चौकशा होत राहतात. मात्र सध्या या विषयावर अधिक राजकीय भाष्य करणार नसल्याचेही अरोरा यांनी स्पष्ट केले.
