वाघोली पोलिस ठाण्यात गुन्हा दाखल
marathinews24.com
पुणे – एसबीआय बँकेचे अॅप बंद पडले असून, ते सुरू करून देतो अशी बतावणी करत सायबर चोरांनी ज्येष्ठ नागरिकाला २ लाखांचा गंडा घातला आहे. ही घटना १ ऑगस्टला दुपारी बारा ते एकच्या सुमारास वाघोलीतील बकोरी फाटा परिसरात घडली आहे. याप्रकरणी ७२ वर्षीय जेष्ठाने वाघोली पोलिस ठाण्यात फिर्याद दाखल केली आहे. त्यानुसार सायबर चोरट्याविरूद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, तक्रारदार हे वाघोलीत राहायला असून, १ ऑगस्टला दुपारी बाराच्या सुमारास सायबर चोरट्यांनी त्यांना फोन केला. एसबीआय बँकेचे अॅप बंद पडल्याची बतावणी केली. ज्येष्ठाने अॅप बघितले असता त्यांना बंद असल्याचे दिसून आले. त्यानंतर सायबर चोरट्याने त्यांना बँकेचे अॅप पुन्हा सुरू करून देतो, अशी बतावणी केली. त्यांच्या मोबाइलवर ऑनलाईनरित्या एक ओटीपी पाठवला. ज्येष्ठाने सायबर चोरांना ओटीपी सांगताच त्यांच्या बँक खात्यातून २ लाख रुपये कमी झाले. फसवणूक झाल्याचे लक्षात येताच ज्येष्ठाने वाघोली पोलिस ठाण्यात धाव घेत तक्रार दाखल केली. पोलिस उपनिरीक्षक शिवशंकर राघू तपास करत आहेत.
