कैद्याविरुद्ध गुन्हा दाखल
marathinews24.com
पुणे – येरवडा कारागृहात दोन कैद्यांनी एकाच्या डोक्यात फरशीचा तुकडा मारुन खून केल्याची घटना ताजी असतानाच एका कैद्याला बेदम मारहाण करण्यात आल्याची घटना घडली. कैद्याने एकाला बेदम मारहाण केल्याने तो गंभीर जखमी झाला. गंभीर दुखापत केल्याप्रकरणी एका कैद्याविरुद्ध गुन्हा दाखल करण्यात आला.
कोथरूडमध्ये तरुणाला मारहाण – सविस्तर बातमी
देवकरप्पा गराळे (वय ६५) असे गंभीर जखमी झालेल्या कैद्याचे नाव आहे. गराळे याच्यावर ससून रुग्णालयात उपचार सुरू आहेत. याप्रकरणी कैदी फजिल अहमद अब्दुलकयुम अन्सारी याच्याविरुद्ध गुन्हा दाखल करण्यात आला आहे.
येरवडा कारागृहातील हवालदार प्रकाश भोसले यांनी येरवडा पोलीस ठाण्यात फिर्याद दिली आहे. पोलिसांनी दिलेल्या माहितीनुसार, गराळे आणि अन्सारी यांना शिक्षा सुनावण्यात आली आहे. कारागृहातील चांगल्या वर्तणुकीमुळे दोघांना खुल्या कारागृहात काम देण्यात आले आहे. ५ जानेवारी रोजी खुल्या कारागृहातील बराक क्रमांक एक परिसरात गराळे आणि अन्सारी यांच्यात वाद झाला. वादातून अन्सारीने गराळे याच्या चेहऱ्यावर ठोसे मारले. ठोसे मारल्याने गराळे फरशीवर पडला. जखमी झालेल्या गराळे याला रुग्णालयात दाखल करण्यात आले. मारहाणीत गराळे यांच्या मेंदूत रक्तस्त्राव झाल्याने ते गंभीर जखमी झाला. त्याच्यावर ससून रुग्णालयात उपचार सुरू आहेत. पोलीस उपनिरीक्षक सी. बी. बेरड तपास करत आहेत.
गेल्या महिन्यात येरवडा कारागृहात खून प्रकरणात न्यायालयीन कोठडीत असलेल्या सराइताने एकाला फरशीच्या तुकड्याने मारहाण केली होती. या घटनेत गंभीर जखमी झालेल्या कैद्याचा ससून रुग्णालयात उपचारादरम्यान मृत्यू झाला होता. येरवडा कारागृहातील हाणामारीच्या घटना रोखण्यासाठी आवारात सीसीटीव्ही कॅमेरे बसविण्यात आले आहेत. कारागृहातील नियंत्रण कक्षाच्या माध्यमातून कैद्यांच्या हालचालीवर लक्ष ठेवण्यात येत आहे
