कोथरूड पोलीस ठाण्यात गुन्हा दाखल
marathinews24.com
पुणे – कोथरूड भागात सदनिकेचे कुलूप तोडून चोरट्यांनी सात लाख ६१ हजार रुपयांचे सोन्याचे दागिने लांबविल्याची घटना घडली. याबाबत एका ज्येष्ठ महिलेने कोथरूड पोलीस ठाण्यात फिर्याद दिली आहे. त्यांनी दिलेल्या फिर्यादीनुसार चोरट्यांविरुद्ध गुन्हा दाखल करण्यात आला आहे.
सिक्कीमधील कंपनीच्या नावे बनावट औषधांची विक्रीचा प्रकार उघड – सविस्तर बातमी
पोलिसांनी दिलेल्या माहितीनुसार, तक्रारदार ज्येष्ठ महिला कोथरूडमधील उजवी भुसारी काॅलनीतील एका सोसायटीत राहायला आहेत. ८ डिसेंबर रोजी त्या नातेवाईकांसोबत त्या पर्यटनासाठी गोव्यात गेल्या होत्या. चोरट्यांनी बंद सदनिकेचे कुलूप तोडले. शयनगृहातील कपाट उचकटून शयनगृाहातील सात लाख ६१ हजार रुपयांचे सोन्याचे दागिने लांबविले. ज्येष्ठ महिला गोव्याहून परतल्या. तेव्हा सदनिकेचे कुलूप तोडून कपाटातील सोन्याचे दागिने चोरून नेण्यात आल्याचा प्रकार उघडकीस आला.
घरफोडीचा प्रकार उघडकीस आल्यानंतर पोलिसांनी घटनास्थळी भेट दिली. सोसायटीच्या परिसरातील सीसीटीव्ही चित्रीकरण पाेलिसांनी ताब्यात घेतले असून, पसार झालेल्या चोरट्यांचा शोध घेण्यात येत आहे. पोलीस उपनिरीक्षक चव्हाण तपास करत आहेत.
हडपसर-सासवड रस्त्यावरील फुरसुंगी परिसरात असललेल्या एका सोसायटीतील सदनिकेचे कुलूप तोडून चोरट्यांनी एक लाख रुपयांच्या सोन्याच्या बांगड्या लांबविल्याचा प्रकार उघडकीस आला. याबाबत एकाने फुरसुंगी पोलीस ठाण्यात फिर्याद दिली आहे. पोलिसांनी दिलेल्या माहितीनुसार, तक्रारदार हे कुटुंबीयांसोबत परवागी विवाह समारंभासाठी गेले होते. चोरट्यांनी सदनिकेतील गच्चीचा दरवाजा उघडून आत प्रवेश केला. शयनगृहातील कपाट उचकटून चोरट्यांनी सोन्याच्या बांगड्या लांबविल्याचा प्रकार नुकताच उघडकीस आला. पोलीस उपनिरीक्षक नलावडे तपास करत आहेत.
