कल्याणीनगर भागात रविवारी दुपारी घडला अपघात
marathinews24.com
पुणे – शहरातील कल्याणीनगर भागात रविवारी दुपारी मद्यधुंद मोटारचालकाने पबमधील एका कर्मचाऱ्याला धडक दिली. अपघातात कर्मचाऱ्याचा मृत्यू झाला. याप्रकरणी मोटार चालकाला पोलिसांनी ताब्यात घेतले आहे. त्याच्याविरुद्ध येरवडा पोलीस ठाण्यात गुन्हा दाखल करण्यात आला आहे. मोटार चालक एका माहिती-तंत्रज्ञान कंपनीत संगणक अभियंता आहे.
प्रेयसी मृतावस्थेत; प्रियकराची रेल्वेसमोर उडी मारून आत्महत्या – सविस्तर बातमी
सत्येंद्र मंडल (वय ३०, मूळ रा. बिहार)असे मृत्युमुखी पडलेल्या कर्मचाऱ्याचे नाव आहे. याप्रकरणी मोटार चालक प्रतापसिंह कायंगडे ( वय ४९, रा. धानोरी) याच्याविरुद्ध पोलिसांनी गुन्हा दाखल केला आहे.
‘कायंगडे मूळचा नवी मुंबईतील आहे. तो नेरूळ भागातील एका सोसायटीात राहायला आहे. तो येरवडा भागातील एका माहिती-तंत्रज्ञान कंपनीत कामाला आहे. सध्या तो धानोरी भागात राहायला आहे. तो रविवारी दुपारी कल्याणीनगर भागातील एका पबमध्ये आला होता. तेथे त्याने मद्यप्राशन केले. दुपारी तीनच्या सुमारास तो पबमधून बाहेर पडला. पबमधील ‘वॅले पार्किंग’ मध्ये मोटार लावली होती. कायंगडेने मद्यप्रशान केले होते. त्यावेळी मद्यधुंद अवस्थेतील कायंगडेला कर्मचाऱ्यांनी मोटारीतून घरी जाऊ नका, असे सांगितले. ॲप आधारित मोटारीतून घरी जा, असे सांगितले, अशी माहिती येरवडा पोलीस ठाण्याचे वरिष्ठ पोलीस निरीक्षक अंजुम बागवान यांनी सांगितले.
‘वॅले पार्किंग’मघून मोटार काढून कायंगडे धानोरीकडे जाण्यास निघाला. मोटार मागे नेत असताना मद्यधुंद अवस्थेतील मोटार चालक कायंगडेचे नियंत्रण सुटले आणि मागे थांबलेला पबमधील कर्मचारी सत्येंद्र मंडल हा गंभीर जखमी झाला. त्याला तातडीने खासगी रुग्णालयात दाखल करण्यात आले. उपचारांदरम्यान त्याचा मृत्यू झाला,’ असे पोलीस निरीक्षक बागवान यांनी सांगितले.
अपघाताची माहिती मिळताच परिमंडळ चारचे पोलीस उपायुक्त सोमय मुंडे, सहायक आयुक्त प्रांजली सोनवणे यांनी घटनास्थळी भेट दिली. आराेपी प्रतापसिंह कायंगडेला ताब्यात घेण्यात आले असून, त्याच्याविरुद्ध सदोष मनुष्यवधाचा गुन्हा रात्री दाखल करण्यात आला. त्याची वैद्यकीय तपासणी ससून रुग्णालयात करण्यात आली आहे.
