अन्न व औषध प्रशासन यांनी “चीज ॲनालॉग” बाबत ग्राहकांना स्पष्ट माहिती देण्याचे निर्देश
marathinews24.com
पुणे – अन्न व औषध प्रशासन यांनी सर्व रेस्टॉरंट, केटरर्स, हॉटेल्स व फास्ट फूड विक्रेत्यांना अन्नपदार्थांमध्ये वापरल्या जाणाऱ्या “चीज ॲनालॉग” बाबत ग्राहकांना स्पष्ट माहिती देण्याचे निर्देश दिले आहेत.
विशेष लेख आला उन्हाळा; आपले आरोग्य सांभाळा – सविस्तर बातमी
अन्न सुरक्षा व मानके कायदा २००६ नुसार ग्राहकांना अन्नातील घटकांची अचूक माहिती मिळणे आवश्यक आहे. पनीर हे शुद्ध दुधापासून तयार होते, तर चीज ॲनालॉग हे खाद्यतेल, स्टार्च व इतर घटकांपासून बनविलेले असल्याने त्याचे स्वरूप वेगळे असते.
चीज ॲनालॉग वापरून तयार केलेल्या पदार्थांची माहिती बिलावर नमूद करणे बंधनकारक आहे. मेन्यू कार्ड, इलेक्ट्रॉनिक डिस्प्ले बोर्डवर स्पष्ट उल्लेख आवश्यक आहे. उत्पादक व पुरवठादारांनी विक्री बिलावर “डेअरी/चीज ॲनालॉग” असा स्पष्ट उल्लेख करणे आवश्यक आहे. ॲनालॉग हा आरोग्यास अपायकार नाही, परंतु त्यातील घटक व पोषणमुल्ये पनीरपेक्षा वेगळी असतात. त्यामुळे ग्राहकांची फसवणूक टाळण्यासाठी योग्य माहिती असे आवश्यक आहे.
ग्राहकांनी पॅकबंद उत्पादनावरील लेबल तपासावे, सुटे पनीर खरेदीवेळी खात्री करून बिल घ्यावे. हॉटेलमध्ये पनीर व चीज अॅनालॉग स्वतंत्र नमूद आहे का ते पाहावे. या कायद्याचे उल्लंघन करणाऱ्या उत्पादक, पुरवठादार व खाद्य व्यवसायिकांवर अन्न सुरक्षा व मानके अधिनियम २००६ अंतर्गत कठोर कारवाई करण्यात येणार आहे.
पुणे विभागातील रेस्टॉरंट/केटरर्स/हॉटेल्स/फास्ट फुड विक्रेते तसेच चीज ॲनालॉग उत्पादक/पनीरचे उत्पादक/पुरवठादार यांनी कायदयातील तरतुदीचे उल्लंघन केल्याचे आढळ्यास त्यांच्यावर प्रशासनामार्फत अन्न सुरक्षा व मानके अधिनियम २००६, नियम व नियमने अंतर्गत संबंधितांवर कठोर कारवाई घेण्यात येईल. तसेच ग्राहकांनी अशा प्रकारची दिशाभूल झाल्यास त्याबाबत तक्रार प्रशासनाच्या १८००-२२२-३६५ या टोल फ्री क्रमांकावर नोंदवावी असे आवाहन दिगंबर भोगावडे, सह आयुक्त (अन्न), अन्न व औषध प्रशासन, पुणे यांनी केले आहे.
