डॉक्टरांची ९६ लाखांची फसवणूक
marathinews24.com
पुणे – शेअर बाजारात गुंतवणुकीच्या आमिषाने सायबर चोरट्यांनी डॉक्टरांची ९५ लाख ६६ हजार रुपयांची फसवणूक केल्याचा प्रकार उघडकीस आला आहे. याबाबत डॉक्टरांनी शिवाजीनगर येथील सायबर पोलीस ठाण्यात फिर्याद दिली आहे. त्यानुसार सायबर चोरट्यांविरुद्ध गुन्हा दाखल करण्यात आला आहे.
हडपसरमधील घरफोडीचा छडा – सविस्तर बातमी
पोलिसांनी दिलेल्या माहितीनुसार, तक्रारदार डॉक्टर हे शिवाजीनगर भागात राहायला आहेत. तक्रारदार डॉक्टरांनी सोशल मीडियावर शेअर बाजारातील गुंतवणुकीबाबत जाहिरात पाहिली. त्यानंतर त्यांनी जाहिरातीतील मोबाइल क्रमांकावर संपर्क साधला. सायबर चोरट्यांनी त्यांना जाळ्यात ओढून शेअर बाजारातील विविध गुंतवणूक योजनांची माहिती दिली. गुंतवणूक केल्यास चांगला परतावा मिळेल, असे आमिष दाखविण्यात आले.
डॉक्टरांनी चोरट्यांच्या खात्यात १६ जून ते १६ जुलै या कालावधीत वेळोवेळी ९५ लाख ६६ हजार रुपये जमा केले. रक्कम जमा केल्यानतंर चोरट्यांनी त्यांना मोठ्या प्रमाणावर परतावा मिळाल्याचे भासविले. मात्र, प्रत्यक्षात त्यांना परतावा दिला नाही. फसवणूक झाल्याचे लक्षात आल्यानंतर त्यांनी नुकतीच सायबर पोलीस ठाण्यात फिर्याद दिली. पोलीस निरीक्षक शरद शेळके तपास करत आहेत.
