सिंहगड रोडवर जेष्ठ महिला ठार
marathinews24.com
पुणे – शहरातील विविध भागात गुरुवारी दुपारी झालेल्या मुसळधार पावसामुळे नागरिकांची दैना उडाली होती. तसेच मंदिराशेजारी फुल विक्रीसाठी बसलेल्या एका जेष्ठ महिलेच्या अंगावर मोठे झाड कोसळून तिचा दुर्दैवी मृत्यू झाल्याची घटना सिंहगड रोडवरील नवशा मारूती मंदिराजवळ घडली. टपरीत महिला फुल विक्रीसाठी बसलेली होती.
उपमुख्यमंत्री एकनाथ शिंदे यांचा ओएसडी असल्याची बतावणी – सविस्तर बातमी
रंजना नवनाथ गिरी (वय ६०, रा. दत्तवाडी) असे मृत्यू झालेल्या महिलेचे नाव आहे. याप्रकरणी पर्वती पोलिस ठाण्यात आकस्मात मृत्यूची नोंद करण्यात आली आहे.
पोलिसांनी दिलेल्या माहितीनुसार, रंजना गिरी दत्तवाडी येथील गणेश मळा परिसरात राहायला होत्या. त्या फुल विक्रीचा व्यवसाय करत होत्या. गुरूवारी हनुमान जयंती असल्याने त्या सकाळपासूनच सिंहगड रोडवरील नवश्या मारूती मंदिराजवळ फुल विक्री करण्यासाठी बसल्या होत्या. मंदिरा शेजारी त्यांची फुल विक्रीची टपरी आहे. दरम्यान, दुपारी अचानक वादळी वाऱ्यासह जोरदार पावसाला सुरूवात झाली. परिसरात अनेक भागात झाडपडीच्या घटना घडल्या. त्याचवेळी नवश्या मारूती मंदिराजवळ वडाचे भले मोठे झाड महिलेच्या टपरीवर कोसळले. यात महिला अडकली गेली. गंभीर जखमी झाल्यानंतर स्थानिक नागरिकांनी तसेच पोलिसांनी महिलेला रुग्णालयात दाखल केले. मात्र, गंभीर जखमी झाल्याने त्यांचा मृत्यू झाला. घटनास्थळी अग्निशमन दलाच्या जवानांसह सिंहगड पोलिसांनी धाव घेतली. मात्र घटनेनंतर परिसरात मोठी वाहतूककोंडी झाली होती.
